కామారెడ్డి, జూలై 14
కామారెడ్డి జిల్లా ఎస్పీ ఎం. రాజేష్ చంద్ర, పోలీసు స్టేషన్కు వచ్చే బాధితుల సమస్యలకు ప్రాధాన్యతనిచ్చి సత్వర పరిష్కారం చూపాలని అధికారులను ఆదేశించారు. మంగళవారం ఆయన కామారెడ్డి టౌన్ పోలీస్ స్టేషన్ను ఆకస్మికంగా తనిఖీ చేసి, రికార్డులు, సిబ్బందిని పరిశీలించి సమీక్ష నిర్వహించారు.
కామారెడ్డి జిల్లాలో ప్రజలు పోలీస్ స్టేషన్కు వచ్చిన ప్రతిసారీ బాధితుల సమస్యలను ప్రాధాన్యంగా తీసుకుని సత్వర పరిష్కారం చూపాలని జిల్లా ఎస్పీ ఎం. రాజేష్ చంద్ర అధికారులకు సూచించారు. మంగళవారం కామారెడ్డి టౌన్ పోలీస్ స్టేషన్ను ఆకస్మికంగా తనిఖీ చేసిన ఆయన స్టేషన్ పరిసరాలు, రికార్డులు, సిబ్బంది రోల్కాల్స్ను పరిశీలించి అనంతరం అధికారులు, సిబ్బందితో సమీక్ష నిర్వహించారు.
స్టేషన్లో నమోదైన ప్రతి కేసును నాణ్యమైన దర్యాప్తుతో వేగంగా పూర్తి చేయాలని, పెండింగ్ కేసులను నిర్దేశిత గడువులో పరిష్కరించాలని ఆదేశించారు. స్వాధీనం చేసుకున్న కేసు ఆస్తులను నిబంధనల మేరకు భద్రపరచాలని, వాటి నిర్వహణలో ఎలాంటి నిర్లక్ష్యం ఉండకూడదన్నారు. అసాంఘిక కార్యకలాపాలపై కఠిన చర్యలు తీసుకుంటూ రాత్రివేళల్లో గస్తీ, వాహన తనిఖీలను మరింత పటిష్టం చేయాలని సూచించారు. బ్లూ కోల్ట్స్, పెట్రోలింగ్ సిబ్బంది ప్రజలకు అందుబాటులో ఉంటూ అప్రమత్తంగా విధులు నిర్వర్తించాలని చెప్పారు.
ఇటీవల పెరుగుతున్న సైబర్ నేరాల నేపథ్యంలో ఆన్లైన్ మోసాలు, డిజిటల్ అరెస్టులు, ఫేక్ లింకులు, ఓటీపీ మోసాలపై గ్రామాలు, విద్యాసంస్థలు, ప్రధాన కూడళ్లలో విస్తృత అవగాహన కార్యక్రమాలు నిర్వహించాలని ఎస్పీ ఆదేశించారు. డయల్-100కు వచ్చే ప్రతి కాల్పై వెంటనే స్పందించి బాధితులకు తక్షణ సహాయం అందించాలని సూచించారు.
పట్టణ ట్రాఫిక్ నిర్వహణపై ప్రత్యేకంగా సమీక్షించిన ఎస్పీ, ట్రాఫిక్ నిబంధనలను కచ్చితంగా అమలు చేయాలని ట్రాఫిక్ పోలీసులకు ఆదేశించారు. నిబంధనలు ఉల్లంఘించే వాహనదారులపై చట్టపరమైన చర్యలు తీసుకోవడంతో పాటు, రోడ్డు భద్రతపై ప్రజల్లో అవగాహన పెంచి ప్రమాదాల నివారణకు చర్యలు చేపట్టాలని పేర్కొన్నారు.
ఆకస్మిక తనిఖీలో డీఎస్పీ మధుసూదన్, టౌన్ ఎస్ఐలు, ట్రాఫిక్ ఎస్ఐ చంద్రశేఖర్తో పాటు ఇతర పోలీసు అధికారులు, సిబ్బంది పాల్గొన్నారు.
