మహిళలు, చిన్నారులపై జరిగే హింస, వేధింపుల కేసుల్లో బాధితులకు సత్వర న్యాయం, రక్షణ, వైద్య సహాయం, కౌన్సెలింగ్, పునరావాస సేవలు సమర్థవంతంగా అందించేందుకు సంబంధిత అన్ని శాఖల మధ్య సమన్వయం అత్యంత కీలకమని జిల్లా అదనపు ఎస్పీ కే. నరసింహారెడ్డి పేర్కొన్నారు. బాధితులకు భరోసా కల్పించడంలో భరోసా కేంద్రాలు కీలక పాత్ర పోషిస్తున్నాయని ఆయన తెలిపారు.
జిల్లా భరోసా కేంద్రంలో నిర్వహించిన భరోసా కన్వర్జెన్స్ సమావేశంలో మహిళలు, చిన్నారుల సంక్షేమానికి సంబంధించిన వివిధ శాఖల అధికారులు, ప్రతినిధులు పాల్గొన్నారు. ఈ సందర్భంగా అదనపు ఎస్పీ మాట్లాడుతూ, మహిళలు, చిన్నారులపై నమోదవుతున్న కేసుల్లో వేగవంతమైన దర్యాప్తుతో పాటు బాధితులకు అవసరమైన సేవలు సకాలంలో అందేలా చర్యలు తీసుకోవాలని సూచించారు.
వైద్య, న్యాయ, కౌన్సెలింగ్, పునరావాస సేవల కల్పనలో పోలీసు శాఖతో పాటు ఇతర శాఖలు సమన్వయంతో పనిచేయాలని ఆయన అన్నారు. బాధితులు వివిధ కార్యాలయాల చుట్టూ తిరగకుండా ఒకే చోట అన్ని సౌకర్యాలు పొందేలా చర్యలు తీసుకోవాలని, తద్వారా వారికి మానసిక స్థైర్యాన్ని అందించాలని నరసింహారెడ్డి తెలిపారు.
భరోసా కేంద్రాల ద్వారా బాధితులకు ఒకే వేదికపై అన్ని రకాల సహాయ సేవలు అందుబాటులోకి తీసుకురావడం ప్రభుత్వ ప్రధాన లక్ష్యమని ఆయన పేర్కొన్నారు. కేసుల పరిష్కారంలో ప్రతి శాఖ తన బాధ్యతలను సమయానుకూలంగా నిర్వర్తిస్తూ రిఫరల్ వ్యవస్థను మరింత బలోపేతం చేయాలని సూచించారు. ఇది బాధితులకు మరింత భరోసాను అందిస్తుందని ఆయన అభిప్రాయపడ్డారు.
ఈ సమావేశంలో డీఎస్పీ మధుసూదన్, భరోసా కోఆర్డినేటర్ కవిత, చైల్డ్లైన్ ప్రతినిధులు, సీడబ్ల్యూసీ, జేజేబీ సభ్యులు, డీఎల్ఎస్ఏ ప్రతినిధులు, పబ్లిక్ ప్రాసిక్యూటర్లు, వైద్య ఆరోగ్య శాఖ అధికారులు, మహిళా–శిశు సంక్షేమ శాఖ అధికారులు, ఎస్ఈఆర్పీ ప్రతినిధులు, స్వచ్ఛంద సంస్థల ప్రతినిధులు, దర్యాప్తు అధికారులు మరియు సిబ్బంది పాల్గొన్నారు.
