జయశంకర్ భూపాలపల్లి జిల్లాలో పర్యటించిన ముఖ్యమంత్రి రేవంత్ రెడ్డి, సోమవారం కాళేశ్వరం చేరుకుని శ్రీ కాళేశ్వర ముక్తేశ్వర స్వామివారిని దర్శించుకున్నారు. అనంతరం, రూ.198 కోట్ల వ్యయంతో చేపట్టనున్న ఆలయ అభివృద్ధి పనులకు భూమిపూజ చేసి, పనులను ప్రారంభించారు. అనంతరం మేడిగడ్డ బ్యారేజ్ను పరిశీలించి, అధికారులతో సమీక్ష నిర్వహించారు.
ముఖ్యమంత్రి రేవంత్ రెడ్డికి ఆలయ అధికారులు, అర్చకులు పూర్ణకుంభంతో ఘన స్వాగతం పలికారు. స్వామివారికి ప్రత్యేక పూజలు నిర్వహించిన అనంతరం, శుభానంద (పార్వతి) అమ్మవారిని కూడా దర్శించుకున్నారు. ఆలయ అధికారులు శేషవస్త్రాలతో సన్మానించి, స్వామివారి చిత్రపటాన్ని అందజేశారు.
మేడిగడ్డ బ్యారేజ్ వద్ద, ముఖ్యమంత్రి ఎన్డీఎస్ఏ చైర్మన్ అనిల్ జైన్తో కలిసి బ్యారేజ్ను పరిశీలించారు. ఇరిగేషన్ అధికారులతో సమీక్ష నిర్వహించి, ప్రాజెక్టు ప్రస్తుత పరిస్థితులపై ఆరా తీశారు. ఈ సమీక్షలో ప్రాజెక్టుకు సంబంధించిన కీలక అంశాలపై చర్చ జరిగినట్లు సమాచారం.
ఈ కార్యక్రమంలో రాష్ట్ర మంత్రులు దుద్దిళ్ల శ్రీధర్బాబు, గడ్డం వివేక్ వెంకటస్వామి, అడ్లూరి లక్ష్మణ్ కుమార్, ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి, పొన్నం ప్రభాకర్ తో పాటు పెద్దపల్లి ఎంపీ గడ్డం వంశీకృష్ణ కూడా పాల్గొన్నారు. వారి సమక్షంలోనే అభివృద్ధి పనులకు భూమిపూజ జరిగింది.
ముఖ్యమంత్రి రాకతో కాళేశ్వరం ఆలయ పరిసరాలు సందడిగా మారాయి. అనంతరం, కాటారం మండలం నస్తూరిపల్లిలో ఏర్పాటు చేసిన బహిరంగ సభలో ముఖ్యమంత్రి ప్రసంగించనున్నారు. ఈ సభలో పలు అభివృద్ధి కార్యక్రమాలపై ప్రకటనలు వెలువడే అవకాశం ఉంది.
