జనగామ జిల్లా తరిగొప్పుల మండల కేంద్రంలోని కస్తూరిబా గాంధీ బాలికల విద్యాలయం, కొత్తగా ప్రారంభించిన ఫార్మా టెక్నాలజీ కోర్సులో 100% ఉత్తీర్ణత సాధించి విద్యా రంగంలో తనదైన ముద్ర వేసింది. మొదటి సంవత్సరం విద్యార్థులు ప్రైవేట్ విద్యా సంస్థలకు దీటుగా ఫలితాలు సాధించారు.
2025-2026 విద్యా సంవత్సరంలో ఇంటర్మీడియట్ వరకు అప్గ్రేడ్ అయిన తరిగొప్పుల కస్తూరిబా గాంధీ బాలికల విద్యాలయం, ఫార్మా టెక్నాలజీ కోర్సులో అద్భుతమైన ఫలితాలను నమోదు చేసింది. ఈ కోర్సులో విద్యనభ్యసించిన మొదటి సంవత్సరం విద్యార్థులందరూ ఉత్తీర్ణత సాధించడం విశేషం.
ఈ ఘనత విద్యార్థుల కృషి, అధ్యాపకుల మార్గదర్శకత్వం, పాఠశాల యాజమాన్యం అందించిన ప్రోత్సాహం ఫలితంగానే సాధ్యమైందని పాఠశాల వర్గాలు తెలిపాయి. ప్రైవేట్ పాఠశాలలకు ధీటుగా ఫలితాలు సాధించడం ద్వారా ప్రభుత్వ విద్యా సంస్థల సామర్థ్యాన్ని చాటిచెప్పారు.
ఈ విద్యా సంవత్సరంలో కతా అలేఖ్య అనే విద్యార్థిని 500 మార్కులకు గాను 459 మార్కులు సాధించి మండలంలోనే టాపరుగా నిలిచింది. ఆమె ప్రతిభ పలువురి ప్రశంసలు అందుకుంది. ఆమె విజయం తోడ్పాటునందించిన కుటుంబ సభ్యులు, ఉపాధ్యాయులు ఆనందం వ్యక్తం చేశారు.
మండల టాపరుగా నిలిచిన అలేఖ్యను ఆమె తండ్రి ఖాతా విజయ్ కుమార్ అభినందించారు. ఈ సందర్భంగా పలువురు ప్రజా ప్రతినిధులు, గ్రామస్తులు విద్యార్థినిని, పాఠశాలను అభినందనలతో ముంచెత్తారు. ఈ విజయం భవిష్యత్ లో మరిన్ని ఉన్నత శిఖరాలను అధిరోహించడానికి దోహదపడుతుందని ఆశాభావం వ్యక్తం చేశారు.
