నారాయణపేట ఆర్డీఓ కార్యాలయంలో మంగళవారం అవినీతి నిరోధక శాఖ (ఏసీబీ) అధికారులు దాడులు నిర్వహించి, ఆర్డీఓ రాంచందర్ నాయక్ను రూ.25 వేల లంచం తీసుకుంటూ రెడ్ హ్యాండెడ్గా పట్టుకున్నారు. జనన ధ్రువీకరణ పత్రాల జారీలో లంచం డిమాండ్ చేసినట్లు ఆరోపణలు వెల్లువెత్తాయి.
ఊట్కూరు మండలానికి చెందిన ఒక వ్యక్తి ఐదు జనన ధ్రువీకరణ పత్రాల కోసం గత ఏడాది జులైలో దరఖాస్తు చేసుకున్నారు. ఈ దరఖాస్తులు ఆర్డీఓ కార్యాలయానికి చేరగా, పత్రాల జారీ కోసం ఆర్డీఓ రాంచందర్ నాయక్ లంచం డిమాండ్ చేసినట్లు బాధితుడు ఆరోపించారు. పది నెలల పాటు కార్యాలయం చుట్టూ తిరిగిన తర్వాత, ఒక్కో పత్రానికి రూ.5000 చొప్పున రూ.25 వేలు ఇవ్వాలని ఆర్డీఓ ఒప్పందం కుదుర్చుకున్నట్లు తెలిసింది.
బాధితుడు అవినీతి నిరోధక శాఖ అధికారులను ఆశ్రయించడంతో, వారి సూచనల మేరకు మంగళవారం ఆర్డీఓ కార్యాలయంలో రూ.25 వేలు లంచం ఇస్తుండగా ఏసీబీ అధికారులు రెడ్ హ్యాండెడ్గా పట్టుకున్నారు. మహబూబ్నగర్ రేంజ్ ఏసీబీ డీఎస్పీ బాలకృష్ణ నేతృత్వంలో ఈ దాడులు జరిగాయి.
ఏసీబీ అధికారులు ఆర్డీఓ కార్యాలయంతో పాటు, అతని నివాసంలోనూ సోదాలు నిర్వహించారు. పట్టుబడిన ఆర్డీఓను అరెస్ట్ చేసి, హైదరాబాద్లోని నాంపల్లి ఏసీబీ కోర్టులో హాజరుపరుస్తామని అధికారులు తెలిపారు. ఈ సంఘటనతో జిల్లా రెవెన్యూ యంత్రాంగంలో కలకలం రేగింది.
