మేడ్చల్–మల్కాజిగిరి జిల్లా కలెక్టర్ మను చౌదరి అల్వాల్లోని కృష్ణానగర్ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేసి, వైద్య సేవలపై అధికారులతో చర్చించారు. రోగులకు మెరుగైన సేవలు అందించాలని, ఇరుకుగా ఉన్న భవనం సమస్యపై ప్రతిపాదనలు సమర్పించాలని ఆదేశించారు.
మేడ్చల్–మల్కాజిగిరి జిల్లా కలెక్టర్ మను చౌదరి బుధవారం అల్వాల్ మండలం పరిధిలోని కృష్ణానగర్ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేశారు. ఆసుపత్రిలోని వివిధ విభాగాలను సందర్శించి, రోగులకు అందుతున్న వైద్య సేవలపై సిబ్బందిని అడిగి తెలుసుకున్నారు.
గర్భిణీ స్త్రీలకు అందుతున్న వైద్య సేవలను ఆయన ప్రత్యేకంగా పరిశీలించారు. రెగ్యులర్ చెకప్లు ఇక్కడే జరుగుతున్నా, ప్రసవాలకు అల్వాల్ పీహెచ్సీకి తరలిస్తున్నారని, రక్త నమూనాల పరీక్షలకు కూడా అల్వాల్ కేంద్రంపైనే ఆధారపడుతున్నారని సిబ్బంది తెలిపారు.
ప్రస్తుత భవనం ఇరుకుగా ఉండటంతో సేవలు అందించడంలో ఇబ్బందులు ఎదురవుతున్నాయని సిబ్బంది విజ్ఞప్తి చేయగా, కొత్త భవనం లేదా భవన మార్పు కోసం స్థలాన్ని గుర్తించి, పూర్తి స్థాయి ప్రతిపాదనలతో కూడిన వినతి పత్రాన్ని సమర్పించాలని అల్వాల్ తహసీల్దార్ రాములను, ఆసుపత్రి అధికారులను కలెక్టర్ ఆదేశించారు.
డ్రగ్ స్టోర్ రూమ్ను కూడా తనిఖీ చేసిన కలెక్టర్, మందుల స్టాక్ రిజిస్టర్ను పరిశీలించి, నాణ్యమైన మందులు అందుబాటులో ఉండేలా చర్యలు తీసుకోవాలని సిబ్బందిని ఆదేశించారు. ప్రజలకు వైద్య సేవలు అందించడంలో నిర్లక్ష్యం వహించకూడదని, మెరుగైన సౌకర్యాలు కల్పించేందుకు జిల్లా యంత్రాంగం చర్యలు తీసుకుంటుందని తెలిపారు.
