నిజామాబాద్, జూలై 8
వర్ని మండలంలోని శ్రీనగర్, జాకోర గ్రామాల్లో 'మన ఊరు–మన భద్రత–మన బాధ్యత' కార్యక్రమంలో భాగంగా ఏర్పాటు చేసిన 31 సీసీ కెమెరాలను నిజామాబాద్ పోలీస్ కమిషనర్ పి. సాయి చైతన్య, ఐపీఎస్., బుధవారం ప్రారంభించారు. ఈ కార్యక్రమంలో భాగంగా గ్రామాల్లో భద్రతను బలోపేతం చేయడం ప్రధాన లక్ష్యం.
ప్రజల భాగస్వామ్యంతో గ్రామాల్లో భద్రతను మరింత బలోపేతం చేయాలనే లక్ష్యంతో చేపట్టిన 'మన ఊరు–మన భద్రత–మన బాధ్యత' కార్యక్రమంలో భాగంగా వర్ని మండలంలోని శ్రీనగర్, జాకోర గ్రామాల్లో ఏర్పాటు చేసిన 31 సీసీ కెమెరాలను నిజామాబాద్ పోలీస్ కమిషనర్ పి. సాయి చైతన్య, ఐపీఎస్., బుధవారం ప్రారంభించారు.
ఈ సందర్భంగా కమిషనర్ మాట్లాడుతూ, ఒక్క సీసీ కెమెరా వంద మంది పోలీసు సిబ్బందితో సమానంగా పనిచేస్తుందని పేర్కొన్నారు. సీసీ కెమెరాల ద్వారా అనుమానాస్పద కదలికలను సులభంగా గుర్తించి వెంటనే చర్యలు తీసుకునే అవకాశం ఉంటుందని చెప్పారు. సాంకేతిక పరిజ్ఞానాన్ని వినియోగించడం ద్వారా పోలీసింగ్ మరింత సమర్థవంతంగా మారుతుందని, నేరాల నియంత్రణతో పాటు ట్రాఫిక్ నిర్వహణలోనూ సీసీ కెమెరాలు కీలక పాత్ర పోషిస్తాయని వివరించారు.
ప్రతి కుటుంబం, ప్రతి వ్యాపార సంస్థ తమ భద్రతను దృష్టిలో ఉంచుకుని సీసీ కెమెరాలు ఏర్పాటు చేసుకోవాలని సూచించారు. ముఖ్యంగా దుకాణాల యజమానులు తప్పనిసరిగా సీసీ కెమెరాలు ఏర్పాటు చేయాలని కోరారు. శ్రీనగర్ గ్రామంలో 15, జాకోర గ్రామంలో 16 సీసీ కెమెరాలు ఏర్పాటు చేసి పోలీసు శాఖకు సహకరించిన రెండు గ్రామపంచాయతీలను కమిషనర్ అభినందించారు.
అదేవిధంగా గ్రామస్తులు సైబర్ నేరాలు, మాదకద్రవ్యాల ముప్పుపై అప్రమత్తంగా ఉండాలని, రోడ్డు ప్రమాదాల నివారణకు ట్రాఫిక్ నిబంధనలు తప్పనిసరిగా పాటించాలని సూచించారు. కమ్యూనిటీ పోలీసింగ్ కార్యక్రమాల్లో ప్రజలు చురుకుగా భాగస్వాములు కావాలని పిలుపునిచ్చారు.
ఈ కార్యక్రమంలో బోధన్ ఏసీపీ శ్రీనివాస్, రుద్రూర్ సీఐ కృష్ణ, వర్ని ఎస్ఐ జి. వంశీకృష్ణ, కోటగిరి ఎస్ఐ శ్రీనివాస్, రుద్రూర్ ఎస్ఐ మనోజ్, శ్రీనగర్ సర్పంచ్ పూర్ణిమ కిరణ్, జాకోర సర్పంచ్ బి. పెద్దసాయిలు, మాదాల చారిటబుల్ ట్రస్ట్ అధ్యక్షుడు సుబ్బారావు, కార్యదర్శి ఠాకూర్, రిటైర్డ్ శాస్త్రవేత్త తోట చేతన్ కుమార్, ఏఎంసీ చైర్మన్ కె. సురేష్బాబు, ఉపసర్పంచ్ దస్తగిరి, బాలవికాస్ ట్రస్ట్ సభ్యులు, గ్రామస్థులు పాల్గొన్నారు.
