కేసీఆర్ ఫోన్ తో కొండపోచమ్మ సాగర్ నుంచి నీటి విడుదల: ఎండిపోతున్న పంటలకు ఊరట

సిద్దిపేట జిల్లాలోని కొట్యాల, అల్లీనగర్, అడవి మజీద్, క్షీరసాగర్ గ్రామాల్లోని వందలాది ఎకరాల పంట పొలాలు నీటి విడుదలకు నోచుకోక ఎండిపోతున్నాయి. ఈ సమస్యపై రైతులు అధికారుల చుట్టూ తిరిగినా ఫలితం లేకపోయింది. దీంతో, డీసీసీబీ మాజీ డైరెక్టర్ అంజిరెడ్డిని ఆశ్రయించారు.

రైతుల సమస్యను అంజిరెడ్డి, ఎర్రవల్లిలోని కేసీఆర్ వ్యవసాయ క్షేత్రంలో ఆయనను కలిసి వివరించారు. ఎండిపోతున్న పంటల ఫోటోలను చూసిన కేసీఆర్, వెంటనే నీటిపారుదల శాఖ ఉన్నతాధికారులకు ఫోన్ చేసి, నీటిని విడుదల చేయాలని ఆదేశించారు.

కేసీఆర్ ఆదేశాలు అందిన వెంటనే, నీటిపారుదల శాఖ అధికారులు స్పందించి, కొండపోచమ్మ సాగర్ నుంచి కాలువలకు నీటిని విడుదల చేశారు. కాలువల్లో నీరు ప్రవహించడంతో రైతుల ముఖాల్లో ఆనందం వెల్లివిరిసింది. ఈ పరిణామం తెలంగాణ రాజకీయాల్లోనూ చర్చకు దారితీసింది.

అధికారంలో లేకపోయినా, కేసీఆర్ ఒక ఫోన్ కాల్‌తో యంత్రాంగాన్ని పరుగులు పెట్టించగలరని ఈ సంఘటన నిరూపించిందని పలువురు అభిప్రాయపడుతున్నారు. తమ పంటలను కాపాడినందుకు రైతులు కేసీఆర్‌కు కృతజ్ఞతలు తెలిపారు.