సిరిసిల్ల నేతన్నలకు విద్యుత్ భారం రద్దు చేయాలి: కేటీఆర్

సిరిసిల్ల వస్త్ర పరిశ్రమపై ఉన్న బ్యాక్ బిల్లింగ్ మరియు సర్‌చార్జి మొత్తాలను పూర్తిగా మాఫీ చేయాలని, పాత బకాయిలతో సంబంధం లేకుండా పరిశ్రమకు నిరంతరాయంగా విద్యుత్ సబ్సిడీ ప్రయోజనాలు అందేలా ఆదేశాలు ఇవ్వాలని కేటీఆర్ కోరారు. కార్మికులు ఆత్మహత్యల బాట పట్టకుండా తక్షణ ఆర్థిక వెసులుబాటు కల్పించాలని విజ్ఞప్తి చేశారు.

గత ప్రభుత్వ హయాంలో 25 హెచ్.పి. వరకు విద్యుత్ సబ్సిడీ పెంచడం పరిశ్రమకు ఊతమిచ్చిందని, అయితే ప్రస్తుతం విద్యుత్ అధికారులు విధిస్తున్న 'బ్యాక్ బిల్లింగ్' భారం వేలాది కుటుంబాల జీవనోపాధిని ప్రమాదంలో పడేసిందని కేటీఆర్ వివరించారు. 2016 నుండి 2024 వరకు సుమారు 127 ఎస్.ఎస్.ఐ (SSI) యూనిట్లపై రూ. 19 కోట్ల బ్యాక్ బిల్లింగ్ భారం మోపారని, అది సర్‌చార్జిలతో కలిపి రూ. 38 కోట్లకు చేరిందని తెలిపారు.

ఈ భారీ బకాయిలను చెల్లించలేక అనేక యూనిట్లు మూతపడ్డాయని, ఇటీవల కాలంలో ఆర్థిక ఇబ్బందులతో 13 మంది కార్మికులు ఆత్మహత్యలకు పాల్పడటం అత్యంత బాధాకరమని కేటీఆర్ ఆవేదన వ్యక్తం చేశారు. ఈ బిల్లుల భారాన్ని మానవీయ కోణంలో రద్దు చేసి నేతన్నను ఆదుకోవాలని ఆయన విన్నవించారు.