శ్రీ సరస్వతీ విద్యా మందిర్ లో సంస్కృతి సమ్మర్ క్యాంప్ ముగింపు, తల్లిదండ్రుల పాదపూజ

శ్రీ సరస్వతీ విద్యా మందిర్ హై స్కూల్ లో జరిగిన ఈ కార్యక్రమంలో, పిల్లలు తమ తల్లిదండ్రులకు పాదపూజ చేశారు. సహజ ఆనంద యోగ శిక్షకులు ఆచార్య శ్రీ రమేష్ గురూజీ మాట్లాడుతూ, తల్లిదండ్రులను దైవంతో సమానంగా చూడాలని, వారికి పాదాభివందనం చేయడం ఎంతో ముఖ్యమని తెలిపారు.

పాఠశాల ప్రబంధకారిణి సహ కార్యదర్శి శ్రీ రంజిత్ మోహన్, పిల్లలకు సెలవుల్లో సంస్కృతి, సభ్యత, ఆచారాలు నేర్పించడమే ఈ సమ్మర్ క్యాంప్ లక్ష్యమని పేర్కొన్నారు. విద్యార్థులకు మార్కుల కంటే సంస్కారమే ముఖ్యమని, చారిత్రక గాథలు చెప్పడం ద్వారా వారిలో స్ఫూర్తి నింపాలని సూచించారు.

తెలంగాణ ప్రాంత శశి వాటిక ప్రముఖ్ శ్రీమతి కొత్తపల్లి ఉమా, నూతన విద్యా విధానం ప్రకారం పిల్లలకు యాక్టివిటీల ద్వారా బోధించడం వలన లైఫ్ స్కిల్స్ పెరుగుతాయని అన్నారు. చిన్నప్పటి నుంచే పిల్లలకు విలువలతో కూడిన విద్యను, నీతి కథలను చెప్పాలని, వారిని మొబైల్ ఫోన్లకు దూరంగా ఉంచాలని సూచించారు.

కార్యక్రమంలో విద్యార్థులు ప్రదర్శించిన సాంస్కృతిక కార్యక్రమాలు, నృత్యాలు ప్రేక్షకులను ఆకట్టుకున్నాయి. పాఠశాల యాజమాన్యం, ఉపాధ్యాయులు, తల్లిదండ్రులు, విద్యార్థులు పెద్ద సంఖ్యలో పాల్గొన్నారు.