కాళేశ్వరం ప్రాజెక్టుపై తెలంగాణ హైకోర్టు వెలువరించిన తీర్పు మాజీ ముఖ్యమంత్రి కల్వకుంట్ల చంద్రశేఖర్ రావు (కేసీఆర్) నైతిక విజయాన్ని సాధించారని అమీన్పూర్ మాజీ మున్సిపల్ చైర్మన్ తుమ్మల పాండురంగారెడ్డి పేర్కొన్నారు. ఈ తీర్పుతో బీఆర్ఎస్ శ్రేణుల్లో పండగ వాతావరణం నెలకొందని తెలిపారు.
హైకోర్టు తీర్పు అనంతరం బుధవారం ఆయన మీడియాతో మాట్లాడుతూ, కాంగ్రెస్ ప్రభుత్వం కావాలనే కేసీఆర్పై బురద చల్లాలని చూస్తోందని, అయితే న్యాయస్థానం తీర్పుతో అది సాధ్యం కాదని తేలిపోయిందని తుమ్మల పాండురంగారెడ్డి విమర్శించారు.
చట్టవిరుద్ధమైన పద్ధతుల్లో కమిషన్లు వేసి కేసీఆర్ను ఇబ్బంది పెట్టాలని చూస్తే న్యాయవ్యవస్థ చూస్తూ ఊరుకోదని ఈ తీర్పు రుజువు చేసిందని ఆయన అన్నారు. కేసీఆర్ తెలంగాణ అభివృద్ధి కోసం రేయింబవళ్లు శ్రమించి కాళేశ్వరం వంటి అద్భుత ప్రాజెక్టును నిర్మించారని, ఆయన చిత్తశుద్ధిని శంకించడం ఎవరి తరమూ కాదని స్పష్టం చేశారు.
హైకోర్టు తీర్పు వెలువడిన వెంటనే అమీన్పూర్ పరిధిలోని బీఆర్ఎస్ నాయకులు, కార్యకర్తలు సంబరాలు జరుపుకున్నారు. "సత్యం ఎప్పుడూ నిలకడగా ఉంటుంది. కేసీఆర్ నాయకత్వంపై మాకు, ప్రజలకు పూర్తి నమ్మకం ఉంది. రాజకీయంగా ఎదుర్కోలేక చేస్తున్న ఇలాంటి కుట్రలను ప్రజలే తిప్పికొడతారు" అని పాండురంగారెడ్డి ధీమా వ్యక్తం చేశారు.
తెలంగాణ గొంతు ఎండిపోకుండా భగీరథ ప్రయత్నం చేసిన నాయకుడు కేసీఆర్ అని, హైకోర్టు తీర్పుతో అసలు నిజం నిగ్గుతేలిందని, ఇది తెలంగాణ ప్రజల విజయమని ఆయన అభివర్ణించారు.
