జర్నలిస్టులంటే ఎవరు? వారికి గుర్తింపు ఎలా లభిస్తుంది? అనే ప్రశ్నలు ప్రస్తుతం సమాజంలో విస్తృతంగా చర్చనీయాంశంగా మారాయి. ప్రభుత్వం అందించే ఉచిత బస్సు ప్రయాణ రాయితీ కార్డు, అక్రిడిటేషన్ కార్డునే జర్నలిస్టుల గుర్తింపునకు ప్రామాణికంగా కొందరు భావిస్తుండగా, మరికొందరు దీనికి భిన్నమైన వాదనలు వినిపిస్తున్నారు. ఈ నేపథ్యంలో, అసలు జర్నలిజం అంటే ఏమిటి, జర్నలిస్టుల విధివిధానాలు ఏమిటనే అంశాలపై తెలంగాణ జర్నలిస్ట్ యూనియన్ రాష్ట్ర కార్యదర్శి బింగి స్వామి తన అభిప్రాయాలను వెలిబుచ్చారు.
ప్రజాస్వామ్యంలో జర్నలిజాన్ని నాలుగో స్తంభంగా పరిగణిస్తారు. ఒకప్పుడు వార్తల ఆధారంగా పత్రికలు అమ్ముడుపోయేవి, కానీ నేడు అనేక మీడియా సంస్థలు తమ స్వప్రయోజనాల కోసం పనిచేస్తున్నాయని, ఇది జర్నలిజం వృత్తిని ప్రమాదంలోకి నెట్టివేస్తోందని బింగి స్వామి పేర్కొన్నారు. ఈ పరిస్థితుల్లో, ఎవరు నిజమైన జర్నలిస్టు, ఎవరు కాదనే సందేహం తలెత్తుతోందని ఆయన అన్నారు.
ప్రభుత్వం జారీ చేసే అక్రిడిటేషన్ కార్డునే జర్నలిస్టుల గుర్తింపునకు ఏకైక ప్రమాణంగా భావించే ధోరణిని ప్రభుత్వం పరోక్షంగా ప్రోత్సహిస్తోందని, దీనికి కొందరు దళారులు తోడై మరింత ప్రచారం కల్పిస్తున్నారని బింగి స్వామి ఆరోపించారు. ఉన్నతాధికారులు, రాజకీయ నాయకులు కూడా ఈ అక్రిడిటేషన్ కార్డు ఆధారంగానే జర్నలిస్టులను గుర్తిస్తూ, మిగతా వారిని 'నకిలీ'లుగా పరిగణిస్తున్నారని, ఇది రాజ్యాంగ స్ఫూర్తికి విరుద్ధమని ఆయన అభిప్రాయపడ్డారు.
నిజమైన జర్నలిస్టును అతనికి ఉన్న జ్ఞానం, సమాజ హితంపై అతనికున్న ఆలోచన, ప్రజాహితమే లక్ష్యంగా పనిచేసే తత్వం, నీతి, నిజాయితీ నిర్ణయిస్తాయని బింగి స్వామి తెలిపారు. మీడియా సంస్థ ఇచ్చే గుర్తింపు కార్డు, జర్నలిస్టుకు అసలైన గుర్తింపు అని, ప్రభుత్వ రాయితీలు, అక్రిడిటేషన్లు లేకపోయినా, నిజాయితీగా ప్రజల కోసం పనిచేసే ఎందరో నిఖార్సయిన పాత్రికేయులు ఉన్నారని ఆయన అన్నారు.
నేడు అక్రిడిటేషన్ కార్డు మార్కెట్లో ఒక వస్తువులా మారిందని, స్వార్థ ప్రయోజనాల కోసం, డబుల్ బెడ్ రూం ఇళ్లు, కార్పోరేట్ వైద్యం, పిల్లలకు ఉచిత విద్య వంటి ఎన్నికల హామీల భ్రమల్లో కొందరు దీనిని దుర్వినియోగం చేస్తున్నారని బింగి స్వామి ఆవేదన వ్యక్తం చేశారు. ప్రభుత్వ ఉదాసీనత, సమాచార శాఖ నిబంధనలను కాలానికి అనుగుణంగా మార్చకపోవడం దీనికి ప్రధాన కారణమని ఆయన విమర్శించారు. ఈ పరిస్థితిపై ప్రభుత్వం, ముఖ్యంగా రేవంత్ సర్కార్ దృష్టి సారించాల్సిన అవసరం ఉందని ఆయన సూచించారు.
