నగరంలోని గోపాల్బాగ్ గోశాల పరిధిలోగల పురాతన శివాలయంలో ఇటీవల జరిగిన దేవతా విగ్రహాల ధ్వంసం ఘటనపై బాధ్యులపై తక్షణమే చర్యలు తీసుకోవాలని అర్బన్ ఎమ్మెల్యే ధన్పాల్ సూర్యనారాయణ డిమాండ్ చేశారు. రాష్ట్రవ్యాప్తంగా హిందూ ఆలయాలపై జరుగుతున్న దాడులు ఆందోళనకరమని ఆయన పేర్కొన్నారు.
ఎమ్మెల్యే ధన్పాల్ సూర్యనారాయణ మాట్లాడుతూ, గోపాల్బాగ్ గోశాల శివాలయంలో మూడు రోజుల క్రితం జరిగిన విగ్రహాల ధ్వంసం ఘటనలో నిందితులను ఇప్పటివరకు పట్టుకోకపోవడం పోలీసుల వైఫల్యమని విమర్శించారు. ఈ గోశాల పరిధిలోని 80 ఎకరాల స్థలంలో జరుగుతున్న కబ్జాలపై జిల్లా యంత్రాంగం దృష్టి సారించాలని కోరారు.
గోశాలలో సుమారు 150 ఆవులు ఉన్నాయని, దేవతా విగ్రహాలకు భద్రత కల్పించలేని పరిస్థితుల్లో గోమాతలకు ఏదైనా ప్రమాదం జరిగితే ఎవరు బాధ్యత వహిస్తారని ఆయన ప్రశ్నించారు. రాష్ట్రంలో ఇలాంటి ఘటనలు పునరావృతం కాకుండా పోలీసులు ప్రత్యేక నిఘా ఏర్పాటు చేసి కఠిన చర్యలు తీసుకోవాలని సూచించారు.
ప్రభుత్వం అన్ని మతాల పట్ల సమాన దృష్టితో వ్యవహరించాలని ఎమ్మెల్యే ధన్పాల్ సూర్యనారాయణ పేర్కొన్నారు. ఈ ఘటనపై సమగ్ర విచారణ జరిపి, దోషులను త్వరగా పట్టుకుని శిక్షించాలని ఆయన డిమాండ్ చేశారు. ఈ సంఘటనపై స్థానికంగా భక్తులు, ప్రజలు ఆందోళన వ్యక్తం చేస్తున్నారు.
