నేర నియంత్రణలో సీసీ కెమెరాల పాత్ర కీలకం: నిజామాబాద్ ఏసీపీ

నిజామాబాద్ పోలీస్ కమిషనర్ ఆదేశాల మేరకు, టౌన్-1 పోలీస్ స్టేషన్ పరిధిలోని ఇస్లాంపూర్, ఖోజా కాలనీ ప్రాంతాల్లో కమ్యూనిటీ కాంటాక్ట్ ప్రోగ్రామ్ నిర్వహించారు. ఈ కార్యక్రమంలో సుమారు 70 మంది పోలీసు అధికారులు, సిబ్బంది పాల్గొని ఆకస్మిక తనిఖీలు చేపట్టారు. ఈ తనిఖీలలో పత్రాలు లేని 20 ద్విచక్ర వాహనాలు, రెండు ఆటోలను స్వాధీనం చేసుకున్నారు.

ఏసీపీ ప్రకాష్ మాట్లాడుతూ, కమ్యూనిటీ కాంటాక్ట్ ప్రోగ్రామ్ ద్వారా ప్రజల్లో భద్రతాభావాన్ని పెంపొందించడంతో పాటు, కాలనీల్లోకి ప్రవేశించే కొత్త వ్యక్తులపై నిఘా ఉంచేందుకు అవకాశం ఉంటుందని తెలిపారు. ప్రజల భాగస్వామ్యంతో ప్రతి కాలనీలో సీసీ కెమెరాలు ఏర్పాటు చేసుకోవాలని ఆయన కోరారు.

సీసీ కెమెరాలు నేరాలను నిరోధించడంలోనే కాకుండా, నేరం జరిగినప్పుడు వాస్తవాలను గుర్తించడం, నిందితులను త్వరగా పట్టుకోవడంలో కూడా ఎంతో ఉపయోగపడతాయని ఏసీపీ వివరించారు. ఇళ్లను అద్దెకు తీసుకునే కొత్త వ్యక్తుల పూర్తి వివరాలను సేకరించాలని, వారి గుర్తింపు పత్రాలను తప్పనిసరిగా పరిశీలించాలని సూచించారు.

అనుమానాస్పద వ్యక్తులు కనిపించినా, కొత్తవారు అనుమానాస్పదంగా సంచరిస్తున్నా వెంటనే పోలీసులకు లేదా డయల్-100కు సమాచారం అందించాలని ప్రజలను కోరారు. ప్రజలకు పోలీసులు ఎల్లప్పుడూ అందుబాటులో ఉంటారనే విశ్వాసాన్ని పెంపొందించడమే కమ్యూనిటీ పోలీసింగ్ కార్యక్రమం ముఖ్య ఉద్దేశమని ఆయన తెలిపారు.