దుష్ప్రచారాన్ని ఖండించిన బండి సంజయ్: సనాతన ధర్మ పరిరక్షణకు కట్టుబడి ఉన్నామని వెల్లడి

బహిరంగ సభా వేదికపై భావోద్వేగానికి గురైన బండి సంజయ్, తనపై కొందరు వ్యక్తులు ఉద్దేశపూర్వకంగా తప్పుడు ప్రచారం చేస్తున్నారని ఆరోపించారు. అయితే, తాను ధర్మాన్ని కించపరిచే పనులు చేయబోనని, పార్టీకి చెడ్డపేరు తెచ్చే పనులకు పాల్పడనని స్పష్టం చేశారు. తమ ధర్మాన్ని ఎవరైనా కించపరిస్తే సహించేది లేదని ఆయన హెచ్చరించారు.

రాజకీయంగా తనను ఎదుర్కోలేకనే ప్రత్యర్థులు ఇలాంటి దుష్ప్రచారాలకు పాల్పడుతున్నారని బండి సంజయ్ ఆరోపించారు. తాను భయపడే వ్యక్తిని కాదని, ఫామ్‌హౌస్‌లో ఉండే ఎలుకను కాదని ఆయన వ్యాఖ్యానించారు. తనను ఎదుర్కోవడానికి ప్రత్యర్థులు ధైర్యంగా ముందుకు రావాలని ఆయన సవాలు విసిరారు.

తండ్రి పేరు చెప్పుకుని రాజకీయాల్లోకి రాలేదని, తనకంటూ సొంత గుర్తింపుతోనే ముందుకు వెళ్తున్నానని బండి సంజయ్ తెలిపారు. తన రాజకీయ ప్రస్థానం గురించి మాట్లాడుతూ, తాను ఎవరినీ అంటిపెట్టుకుని ఎదగలేదని ఆయన పేర్కొన్నారు. సనాతన ధర్మాన్ని పరిరక్షించడం తమ కర్తవ్యమని, ఈ విషయంలో రాజీ పడేది లేదని ఆయన పునరుద్ఘాటించారు.