కుమ్రంభీం ఆసిఫాబాద్ జిల్లాలో దారుణం చోటుచేసుకుంది. వల్లగొండ గ్రామపంచాయతీ పరిధిలోని సీతానగర్ శివారులో ఉన్న పత్తి చేనులో ఒక పసికందును వదిలివేసిన ఘటన శనివారం స్థానికంగా కలకలం సృష్టించింది.
స్థానికులు ఉదయం పత్తి చేను వద్దకు వెళ్ళినప్పుడు, ఒక శిశువు ఏడుస్తున్న శబ్దం వినిపించింది. వెంటనే అటువైపు వెళ్లి చూడగా, సంచిలో కట్టి పడేసి ఉన్న ఆడ శిశువు కనిపించింది. దీంతో వారు వెంటనే పోలీసులకు సమాచారం అందించారు.
సమాచారం అందుకున్న పోలీసులు వెంటనే సంఘటనా స్థలానికి చేరుకున్నారు. శిశువును సురక్షితంగా బయటకు తీసి, కాగజ్ నగర్ లోని ఒక ప్రైవేట్ ఆసుపత్రికి తరలించి చికిత్స అందించారు.
ఈ విషయంపై బాల సంరక్షణ అధికారి మహేశ్ కు తెలియజేయగా, ఆయన తన సిబ్బందితో సంఘటనా స్థలానికి చేరుకున్నారు. సుమారు ఒక రోజు వయసున్న శిశువును బాల సంరక్షణ కేంద్రానికి తరలించారు.
పోలీసులు ఈ ఘటనపై లోతుగా విచారణ ప్రారంభించారు. శిశువును వదిలివేసిన తల్లిదండ్రుల కోసం గాలింపు చర్యలు చేపట్టారు. ఈ ఘటనపై ప్రజలు తీవ్ర దిగ్భ్రాంతి వ్యక్తం చేస్తున్నారు.
