ఉపాధ్యాయుల సంక్షేమమే ధ్యేయంగా, వారి సమస్యల పరిష్కారానికి నిరంతర పోరాటమే మార్గమని పీఆర్టీయూ తెలంగాణ వ్యవస్థాపక అధ్యక్షులు గాల్ రెడ్డి హర్షవర్ధన్ రెడ్డి స్పష్టం చేశారు. కామారెడ్డిలో రాష్ట్ర, జిల్లా బాధ్యులతో సమావేశం అనంతరం ఆయన ఈ వ్యాఖ్యలు చేశారు.
ఉపాధ్యాయ వర్గాలైన భాషా పండితులు, పీఈటీలు, ఎస్జీటీలు, స్కూల్ అసిస్టెంట్లకు పదోన్నతులు కల్పించడంలో పీఆర్టీయూ తెలంగాణ కీలక పాత్ర పోషించిందని హర్షవర్ధన్ రెడ్డి గుర్తు చేశారు. రాబోయే రోజుల్లో పెండింగ్లో ఉన్న అన్ని సమస్యల పరిష్కారానికి ముందుండి పోరాడుతామని ఆయన హామీ ఇచ్చారు.
పీఆర్టీయూ తెలంగాణ ప్రధాన డిమాండ్లలో సీపీఎస్ రద్దు, ఓపీఎస్ పునరుద్ధరణ, 2003 డీఎస్సీ ఉపాధ్యాయులకు జీవో 57/4, 57/5 అమలు, ఉమ్మడి సర్వీస్ రూల్స్ సాధన, ప్రతి ఏడాది వేసవి సెలవుల్లో పదోన్నతులు, బదిలీలు నిర్వహణ ఉన్నాయి.
అంతేకాకుండా, కేజీబీవీల్లో పనిచేస్తున్న పీజీసీఆర్టీలు, సీఆర్టీలు, ఎస్ఎస్ఏ సిబ్బందికి మినిమం టైం స్కేలు మరియు హెల్త్ కార్డులు, మోడల్ స్కూల్స్, గురుకులాల సిబ్బంది సమస్యల పరిష్కారం, ఎయిడెడ్ స్కూల్స్ను ప్రభుత్వ పాఠశాలల్లో విలీనం చేయాలని కూడా సంస్థ కోరుతోంది.
విద్యా కమిషన్ సూచనలపై స్పందిస్తూ, “ఉపాధ్యాయుల వేతనాలను ఖర్చుగా చూడటం అవివేకం. విద్యపై ఖర్చు పెట్టుబడే. అదే రేపటి ఉత్తమ పౌరులు, నాయకులు, అధికారుల రూపంలో దేశానికి లాభంగా మారుతుంది” అని హర్షవర్ధన్ రెడ్డి పేర్కొన్నారు. ఈ సమావేశంలో రాష్ట్ర, జిల్లా స్థాయి నాయకులు పాల్గొన్నారు.