నీట్ యూజీ 2024 ప్రశ్నపత్రం లీక్ వ్యవహారం దేశవ్యాప్తంగా తీవ్ర దుమారం రేపుతున్న నేపథ్యంలో, కాంగ్రెస్ ఎంపీ రాహుల్ గాంధీ ప్రధాని నరేంద్ర మోదీని లక్ష్యంగా చేసుకుని పలు ప్రశ్నలు సంధించారు. విద్యాశాఖ మంత్రి రాజీనామా చేయకపోవడం, ప్రధాని మౌనంపై ఆయన తీవ్ర అభ్యంతరం వ్యక్తం చేశారు.
దేశవ్యాప్తంగా విద్యార్థులు, ప్రతిపక్ష పార్టీలు నీట్ పేపర్ లీక్ వ్యవహారంపై తీవ్ర ఆగ్రహం వ్యక్తం చేస్తున్నాయి. ఈ నేపథ్యంలో, లోక్సభ ప్రతిపక్ష నేత, కాంగ్రెస్ ఎంపీ రాహుల్ గాంధీ కేంద్ర ప్రభుత్వం, ప్రధాని నరేంద్ర మోదీపై విమర్శలు గుప్పించారు. తాజాగా ఆయన ఎక్స్ (ట్విట్టర్) వేదికగా ప్రధానికి పలు ప్రశ్నలు సంధిస్తూ పోస్టు పెట్టారు.
రాహుల్ గాంధీ తన పోస్టులో, 'నీట్ 2024 పేపర్ లీక్ అయింది. పరీక్ష రద్దు కాలేదు. కేంద్ర విద్యాశాఖ మంత్రి రాజీనామా చేయలేదు. సీబీఐ కేసు నమోదు చేసి దర్యాప్తు ప్రారంభించింది. ఘటనపై నిజానిజాలు తేల్చేందుకు కేంద్రం కమిటీని కూడా ఏర్పాటు చేసింది. నీట్ 2026లో కూడా పేపర్ లీక్ అయింది. పరీక్ష రద్దు అయింది. అయినా సంబంధిత కేంద్ర మంత్రి రాజీనామా చేయలేదు. సీబీఐ మళ్లీ దర్యాప్తు చేస్తోంది. మరో కమిటీని ఏర్పాటు చేయనున్నారు' అని పేర్కొన్నారు.
దీనిపై స్పందిస్తూ, 'మోదీ గారూ.. దేశం మిమ్మల్ని కొన్ని ప్రశ్నలు అడుగుతోంది. వాటికి సమాధానం చెప్పండి. పేపర్ లీక్ ఘటనలు పదేపదే ఎందుకు జరుగుతున్నాయి? ఈ పరీక్షా పత్రాల లీక్పై మీరు ఎప్పుడూ ఎందుకు మౌనం వహిస్తున్నారు? పదేపదే విఫలమవుతున్న విద్యాశాఖ మంత్రిని ఎందుకు తొలగించడం లేదు?' అని రాహుల్ గాంధీ నిలదీశారు.
పేపర్ లీక్ వ్యవహారంలో సంబంధిత కేంద్ర మంత్రి రాజీనామా చేయకపోవడం, ప్రధాని మౌనం వహించడంపై రాహుల్ గాంధీ తీవ్ర అసహనం వ్యక్తం చేశారు. విద్యార్థుల భవిష్యత్తుతో ఆటలాడుకుంటున్నారని ఆయన విమర్శించారు.
