పాఠశాల బస్సుల ఫిట్‌నెస్ పై RTA అధికారులకు అల్లూరి ముదిరాజ్ విజ్ఞప్తి

వేసవి సెలవుల కారణంగా నిలిచిపోయిన ప్రైవేట్ పాఠశాల బస్సుల ఫిట్‌నెస్ పై జీ అల్లూరి ముదిరాజ్ ఆందోళన వ్యక్తం చేశారు. సెలవుల కాలంలో సరైన నిర్వహణ లేకపోవడం, కొన్ని బస్సులు అద్దెకు వెళ్లడం వల్ల వాటి సామర్థ్యం దెబ్బతిని ప్రమాదాలకు గురయ్యే అవకాశం ఉందని ఆయన అన్నారు.

పాఠశాలలు తిరిగి ప్రారంభం కాకముందే, RTA అధికారులు ప్రైవేట్ పాఠశాల బస్సులకు తప్పనిసరిగా ఫిట్‌నెస్ పరీక్షలు నిర్వహించి, ధృవీకరణ పొందిన తర్వాతే రోడ్లపైకి అనుమతించాలని ఆయన విజ్ఞప్తి చేశారు. 15 సంవత్సరాలు దాటిన, ఫిట్‌నెస్ లేని బస్సులను వెంటనే సీజ్ చేయాలని డిమాండ్ చేశారు.

పాఠశాల యాజమాన్యాలకు బస్సుల ఫిట్‌నెస్ ప్రాముఖ్యతను వివరించి, అవగాహన కల్పించాలని అధికారులను కోరారు. బస్సులకు పసుపు రంగు, పాఠశాల పేరు, ఫోన్ నంబర్, డ్రైవర్ అర్హతలు, ఫస్ట్ ఎయిడ్ కిట్, ఫైర్ ఎక్స్టింగ్విషర్లు వంటి నిబంధనలను తప్పనిసరిగా పాటించాలని సూచించారు.

ఈ నిబంధనలను పాటించని బస్సులను వెంటనే సీజ్ చేయాలని అల్లూరి ముదిరాజ్ అధికారులను కోరారు. ఈ విషయంలో RTA అధికారులు తక్షణమే స్పందించి, విద్యార్థుల భద్రతకు కట్టుదిట్టమైన చర్యలు తీసుకోవాలని ఆయన విజ్ఞప్తి చేశారు.