లైంగిక వేధింపులకు గురైన మహిళలు, చిన్నారులకు అండగా నిలుస్తున్న 'భరోసా' కేంద్రాల పనితీరును రాష్ట్ర అడిషనల్ డీజీపీ (సీఐడీ & ఏసీబీ) చారు సిన్హా గురువారం కరీంనగర్ జిల్లా కొత్తపల్లిలో పరిశీలించారు.
కొత్తపల్లిలోని భరోసా కేంద్రాన్ని సందర్శించిన అడిషనల్ డీజీపీ, అక్కడి సేవలను క్షేత్రస్థాయిలో తనిఖీ చేశారు. కేంద్రంలోని వివిధ విభాగాలను పరిశీలించి, సిబ్బందితో సమావేశమై పనితీరును సమీక్షించారు. రికార్డులను క్షుణ్ణంగా పరిశీలించి, రిజిస్టర్ల నిర్వహణపై సిబ్బందికి సూచనలు ఇచ్చారు.
బాధితులకు తక్షణ న్యాయ సహాయం, కౌన్సిలింగ్ అందించడంలో ఎటువంటి జాప్యం జరగకూడదని ఆమె స్పష్టం చేశారు. లైంగిక వేధింపుల కేసుల్లో నిందితులకు కఠిన శిక్షలు పడేలా పక్కాగా ఆధారాలను సేకరించాలని, బాధితులకు ప్రభుత్వపరంగా అందాల్సిన నష్టపరిహారం సకాలంలో అందేలా చర్యలు తీసుకోవాలని అధికారులను ఆదేశించారు.
తెలంగాణ పోలీసు శాఖలోని ఉమెన్ సేఫ్టీ వింగ్ ఆధ్వర్యంలో రాష్ట్రవ్యాప్తంగా ఏర్పాటు చేసిన ఈ భరోసా కేంద్రాలు మంచి ఫలితాలనిస్తున్నాయని అడిషనల్ డీజీపీ తెలిపారు. 2024 డిసెంబర్లో ప్రారంభమైన ఈ కేంద్రాలు, బాధితులకు పోలీస్ స్టేషన్లు, ఆసుపత్రులకు తిరిగే ఇబ్బంది లేకుండా ఒకే చోట అన్ని సేవలను అందిస్తున్నాయని ప్రశంసించారు.
తనిఖీ అనంతరం అడిషనల్ డీజీపీ చారు సిన్హా భరోసా కేంద్రం ఆవరణలో మొక్కను నాటారు. ఈ కార్యక్రమంలో అడిషనల్ డీసీపీ వెంకటరమణ, ఏసీపీ వెంకటస్వామి, మహిళా పోలీస్ స్టేషన్ ఇన్ స్పెక్టర్ పుల్లయ్య, ఎస్సై అనూష, భరోసా కేంద్రం సిబ్బంది, ఇతర పోలీసు అధికారులు పాల్గొన్నారు.
