రాష్ట్ర మంత్రివర్గం పలు కీలక నిర్ణయాలు తీసుకుంది. విద్యుత్ కొనుగోళ్లు, థర్మల్ ప్రాజెక్టులలో జరిగిన అక్రమాలపై విచారణ నివేదికను సీబీఐకి అప్పగించాలని, భూముల ధరలను సవరించాలని, మార్కెట్ విలువలను క్రమబద్ధీకరించాలని నిర్ణయించింది. ఈ మేరకు రిజిస్ట్రేషన్ శాఖకు అనుమతి మంజూరు చేసింది.
విద్యుత్ కొనుగోళ్లు, భద్రాద్రి, యాదాద్రి థర్మల్ ప్రాజెక్టులలో జరిగిన అవకతవకలపై ఏర్పాటు చేసిన విచారణ కమిషన్ నివేదికను కేంద్ర దర్యాప్తు సంస్థ (సీబీఐ)కు అప్పగించాలని రాష్ట్ర మంత్రివర్గం నిర్ణయించింది. అంతర్రాష్ట్ర అంశాలు, కేంద్ర ప్రభుత్వ రంగ సంస్థలు ఈ కేసులో ఉన్నందున, నిష్పాక్షిక దర్యాప్తు కోసం ఈ నిర్ణయం తీసుకున్నట్లు అధికారులు తెలిపారు. తదుపరి ప్రక్రియను వేగవంతం చేయాలని ఆదేశాలు జారీ అయ్యాయి.
భూముల ధరల సవరణ, మార్కెట్ విలువల క్రమబద్ధీకరణకు మంత్రివర్గం ఆమోదం తెలిపింది. వివిధ ప్రాజెక్టులు, అభివృద్ధి పనుల నేపథ్యంలో భూములు కోల్పోతున్న నిర్వాసితులు ధరల పెంపునకు విజ్ఞప్తులు చేస్తున్న నేపథ్యంలో, వాస్తవ మార్కెట్ ధరలకు, ప్రభుత్వ ధరలకు మధ్య ఉన్న వ్యత్యాసాన్ని శాస్త్రీయ పద్ధతిలో సవరించాలని నిర్ణయించింది. సవరించిన విలువలు ఈ నెల చివరి వారం నుంచి అమల్లోకి వస్తాయి.
హిల్ట్ పాలసీలో దరఖాస్తు చేసుకునే వారికి కూడా ఒక అవకాశం ఇవ్వాలని, భూముల ధరలు పెరిగేలోపు దరఖాస్తు చేసుకున్న వారికి పది శాతం చెల్లించి, మిగిలిన 90 శాతాన్ని 90 రోజుల్లో చెల్లించే వెసులుబాటు కల్పించాలని మంత్రివర్గం నిర్ణయించింది. అకాల వర్షాలతో పంట నష్టపోయిన రైతులను ఆదుకోవాలని ముఖ్యమంత్రి ఆదేశించారు.
నల్గొండ-రంగారెడ్డి పాల ఉత్పత్తిదారుల సంఘాన్ని నేషనల్ డెయిరీ డెవలప్మెంట్ బోర్డుకు అప్పగించే ఎంవోయూకు ఆమోదం లభించింది. అలాగే, 9 జిల్లాల్లో 33/11 కేవీ సబ్ స్టేషన్ల వద్ద సోలార్ పవర్ జనరేషన్ ప్లాంట్ల ఏర్పాటుకు, గ్రేటర్ హైదరాబాద్, సైబరాబాద్, మల్కాజ్గిరి మున్సిపల్ కార్పొరేషన్లలో పెండింగ్ లో ఉన్న ప్రభుత్వ కార్యాలయాల పన్నుల చెల్లింపునకు వన్ టైమ్ సెటిల్మెంట్ (OTS) ప్రతిపాదనకు కేబినెట్ ఆమోదం తెలిపింది. ఖమ్మం జిల్లాలో కాలువ నిర్మాణం, ఐటీఐలు, పాలిటెక్నిక్లు, టీ శాట్ ను ఒకే గొడుగు కిందకు తీసుకురావడం, ఆధునిక కూరగాయల మార్కెట్ కోసం భూమి కేటాయింపు వంటి అంశాలపై కూడా నిర్ణయాలు తీసుకున్నారు.
