తెలంగాణలో మావోయిస్టుల శకం ముగిసింది: 42 మంది భారీ లొంగుబాటు

తెలంగాణ రాష్ట్ర డీజీపీ బి. శివధర్ రెడ్డి సమక్షంలో 42 మంది మావోయిస్టులు లొంగిపోయారు. వీరిలో పీఎల్‌జీఏ బెటాలియన్ డిప్యూటీ కమాండర్ కేశాలు, డివిజనల్ కమిటీ సభ్యులు, ఏరియా కమిటీ సభ్యులు ఉన్నారు. బెటాలియన్ కమాండర్ దేవన్న ఇప్పటికే లొంగిపోయిన నేపథ్యంలో, ఈ బృందం పోలీసులకు లొంగిపోయింది. వీరి వెంట సుమారు 40 అత్యాధునిక ఆయుధాలు కూడా పోలీసులకు అప్పగించారు.

లొంగిపోయిన వారిలో 41 మంది ఛత్తీస్‌గఢ్ రాష్ట్రానికి చెందిన వారని, ఒకరు మాత్రమే తెలంగాణకు చెందిన వారని డీజీపీ శివధర్ రెడ్డి తెలిపారు. ఛత్తీస్‌గఢ్‌లో భద్రతా బలగాల ఆపరేషన్లు తీవ్రతరం కావడంతో, తెలంగాణను సురక్షితమైన ప్రాంతంగా భావించి ఇక్కడి పోలీసులను ఆశ్రయించినట్లు మావోయిస్టులు పేర్కొన్నారు. ఇది తెలంగాణలో మావోయిస్టులకు గట్టి ఎదురుదెబ్బగా పరిగణించబడుతోంది.

ఈ సందర్భంగా డీజీపీ శివధర్ రెడ్డి మాట్లాడుతూ, "ఈ భారీ లొంగుబాటుతో తెలంగాణలో పీఎల్‌జీఏ బెటాలియన్ పూర్తిస్థాయిలో కనుమరుగైంది. ప్రస్తుతం రాష్ట్రంలో క్రియాశీలక మావోయిస్టు కేడర్ ఎవరూ లేరు. దీనితో తెలంగాణ ఇప్పుడు పూర్తిస్థాయిలో 'మావోయిస్టు రహిత' రాష్ట్రంగా అవతరించిందని గర్వంగా ప్రకటిస్తున్నాను" అని వెల్లడించారు. అడవుల్లో ఇంకా మిగిలి ఉన్నవారు కూడా ఆయుధాలు వీడి జనజీవన స్రవంతిలో కలవాలని ఆయన విజ్ఞప్తి చేశారు.

లొంగిపోయిన మావోయిస్టులకు ప్రభుత్వ నిబంధనల ప్రకారం తక్షణ ఆర్థిక సహాయం మరియు పునరావాసం కల్పిస్తామని డీజీపీ హామీ ఇచ్చారు. ఈ పరిణామం తెలంగాణ రాష్ట్రంలో శాంతిభద్రతల పరిరక్షణకు ఒక ముఖ్యమైన పరిణామంగా భావిస్తున్నారు.