ఉపాధి హామీ పథకం అమలులో డిజిటల్ వ్యవస్థను బలోపేతం చేసేందుకు జిల్లా యంత్రాంగం కీలక చర్యలు చేపట్టింది. దీనిలో భాగంగా, జిల్లాలోని 25 మండలాలకు కంప్యూటర్లను పంపిణీ చేశారు.
ఉపాధి హామీ పథకం అమలులో సేవల వేగాన్ని, పారదర్శకతను పెంచేందుకు జిల్లా యంత్రాంగం చర్యలు చేపట్టింది. రాష్ట్ర గ్రామీణాభివృద్ధి శాఖ కమిషనర్ కార్యాలయం నుంచి అందిన కంప్యూటర్లను జిల్లా కలెక్టర్ ఆశిష్ సాంగ్వాన్ ఐడీఓసీ సమావేశ మందిరంలో జిల్లాలోని 25 మండలాల ఎంపీడీఓలకు పంపిణీ చేశారు.
కలెక్టర్ ఆశిష్ సాంగ్వాన్ మాట్లాడుతూ, ఉపాధి హామీ పనుల్లో డిజిటల్ వ్యవస్థను మరింత బలోపేతం చేయడం ద్వారా సేవల నాణ్యతను మెరుగుపరచాలని స్పష్టం చేశారు. ఫీల్డ్ అసిస్టెంట్లు, టెక్నికల్ సిబ్బంది మస్టర్లు, మెజర్మెంట్ బుక్లు, బిల్లులను పూర్తిగా ఆన్లైన్లో నమోదు చేయాలని సూచించారు. కూలీలకు వేతనాలు సకాలంలో అందేలా చర్యలు తీసుకోవాలని ఆదేశించారు.
ఈ కంప్యూటర్ల పంపిణీతో జిల్లాలోని అన్ని మండల పరిషత్ కార్యాలయాల్లో ఉపాధి హామీ విభాగాల పనితీరు మెరుగుపడుతుందని అధికారులు తెలిపారు. డిజిటల్ విధానాల అమలు ద్వారా క్షేత్రస్థాయిలో పనుల పర్యవేక్షణ సులభతరం అవుతుందని, లబ్ధిదారులకు సేవలు మరింత వేగంగా అందుతాయని అంచనా వేస్తున్నారు.
ఈ కార్యక్రమంలో జిల్లా అదనపు కలెక్టర్ (రెవెన్యూ) వి. విక్టర్, జెడ్పీ సీఈఓ చందర్, డీఆర్డీఓ ఎం. సురేందర్, మండల ప్రత్యేక అధికారులు, ఎంపీడీఓలు తదితరులు పాల్గొన్నారు.
