తెలంగాణ ప్రభుత్వం ప్రకటించిన రాజీవ్ యువ వికాసం పథకం అమలులో జాప్యం జరుగుతోందని, దీనిపై నిరుద్యోగ యువత తీవ్ర అసంతృప్తి వ్యక్తం చేస్తున్నారు. గత ఏడాది దరఖాస్తులు స్వీకరించినప్పటికీ, ఇప్పటివరకు పథకం ప్రారంభం కాకపోవడంపై వారు ఆందోళన చెందుతున్నారు.
నిరుద్యోగ యువతకు ఆర్థిక సహాయం అందించే లక్ష్యంతో తెలంగాణ ప్రభుత్వం గత ఏడాది మార్చి 15 నుండి ఏప్రిల్ 14వ తేదీ వరకు రాజీవ్ యువ వికాసం పథకం కింద దరఖాస్తులను స్వీకరించింది. ఈ పథకం గత ఏడాది జూన్ 2వ తేదీన ప్రారంభం కావాల్సి ఉంది.
అయితే, సేకరించిన లక్షలాది దరఖాస్తులు ప్రస్తుతం మూలన పడి ఉన్నాయని, పథకం అమలుపై ప్రభుత్వం నుంచి ఎటువంటి స్పష్టత లేదని నిరుద్యోగులు ఆరోపిస్తున్నారు. కేవలం ఆదిలాబాద్ జిల్లాలోనే 57,965 దరఖాస్తులు స్వీకరించినట్లు సమాచారం.
గత ఏడాది రాష్ట్ర ఆవిర్భావ దినోత్సవం నాడు అర్హులైన వారందరికీ ఈ పథకం ద్వారా లబ్ధి చేకూరుస్తామని కాంగ్రెస్ ప్రభుత్వం హామీ ఇచ్చింది. ఈ హామీతోనే అనేక మంది యువత కాంగ్రెస్ పార్టీకి మద్దతు పలికినట్లు చెబుతున్నారు.
పథకం అమలు చేసే ఉద్దేశం లేనప్పుడు దరఖాస్తులు స్వీకరించి, తమను కార్యాలయాల చుట్టూ తిప్పించుకోవడం సరికాదని నిరుద్యోగులు మండిపడుతున్నారు. ఇప్పటికైనా ప్రభుత్వం తమ హామీని నిలబెట్టుకొని, రాజీవ్ యువ వికాసం పథకాన్ని సత్వరమే అమలు చేయాలని వారు డిమాండ్ చేస్తున్నారు.