తెలంగాణ రాష్ట్రంలో ఇంటర్మీడియట్ అడ్వాన్సుడ్ సప్లిమెంటరీ పరీక్షలు మే 13 నుంచి ప్రారంభం కానున్నాయి. ఈ పరీక్షల కోసం 3.97 లక్షల మందికి పైగా విద్యార్థులు ఫీజులు చెల్లించారు. హాల్ టికెట్లను అధికారులు గురువారం విడుదల చేయనున్నారు.
తెలంగాణ ఇంటర్మీడియట్ అడ్వాన్సుడ్ సప్లిమెంటరీ పరీక్షలు ఈ నెల 13 నుంచి 21 వరకు జరగనున్నాయని ఇంటర్ బోర్డు అధికారులు ప్రకటించారు. పరీక్షలకు సంబంధించిన హాల్ టికెట్లను గురువారం విడుదల చేయనున్నారు. తొలుత కాలేజీల లాగిన్లలో అందుబాటులో ఉంచి, అనంతరం రెండు రోజుల్లో విద్యార్థుల వాట్సాప్ నంబర్లకు పంపించనున్నట్లు తెలిపారు. విద్యార్థులు తమ రిజిస్ట్రేషన్ నంబర్ ద్వారా హాల్ టికెట్లను డౌన్లోడ్ చేసుకోవచ్చని సూచించారు.
ఈ అడ్వాన్సుడ్ సప్లిమెంటరీ పరీక్షల కోసం మొత్తం 3,97,997 మంది విద్యార్థులు ఫీజులు చెల్లించారు. వీరిలో ఒకేషనల్ విభాగంలో 28,703 మంది విద్యార్థులు ఉన్నారు. పరీక్షల నిర్వహణకు సంబంధించి ఇంటర్ బోర్డు అన్ని ఏర్పాట్లను పూర్తి చేస్తోంది. ఇప్పటికే పరీక్షల షెడ్యూల్ కూడా విడుదల చేయబడింది.
షెడ్యూల్ ప్రకారం, ఇంటర్ సప్లిమెంటరీ పరీక్షలు మే 13 నుంచి మే 21 వరకు ప్రతిరోజూ రెండు సెషన్లలో నిర్వహించబడతాయి. మొదటి సంవత్సరం పరీక్షలు ఉదయం 9 గంటల నుంచి మధ్యాహ్నం 12 గంటల వరకు, రెండవ సంవత్సరం పరీక్షలు మధ్యాహ్నం 2:30 గంటల నుంచి సాయంత్రం 5:30 గంటల వరకు జరుగుతాయి. విద్యార్థులు పరీక్షా కేంద్రాలకు నిర్ణీత సమయానికి చేరుకోవాలని సూచించారు.
