సుల్తానాబాద్ మండలం ఆరేపల్లి గ్రామ శివారులోని సాయిరాం బ్రిక్స్లో గంజాయి మొక్కలు పెంచుతున్న ఒడిశాకు చెందిన ఒక వ్యక్తిని పోలీసులు అరెస్టు చేశారు. అతని వద్ద నుండి ఐదు గంజాయి మొక్కలను స్వాధీనం చేసుకున్నారు.
సుల్తానాబాద్ పోలీసులు, మండల వ్యవసాయ అధికారి సమక్షంలో సాయిరాం బ్రిక్స్లో తనిఖీలు నిర్వహించగా, ఈ ఘటన వెలుగులోకి వచ్చింది. గంజాయి సేవించే అలవాటు ఉన్న సుకల్పరబోయి అనే వ్యక్తి, ఐదు నెలల క్రితం పని నిమిత్తం ఇక్కడికి వచ్చి, తనతో పాటు తెచ్చుకున్న గంజాయి గింజలను నాటి మొక్కలను పెంచుతున్నట్లు విచారణలో తేలింది.
అదుపులోకి తీసుకున్న వ్యక్తి నుండి ఐదు గంజాయి మొక్కలను స్వాధీనం చేసుకున్న పోలీసులు, వాటి విలువ సుమారు రూ. 50,000 వరకు ఉంటుందని అంచనా వేశారు. నిందితుడిపై కేసు నమోదు చేసి, దర్యాప్తు కొనసాగిస్తున్నారు.
ఈ తరహా కార్యకలాపాలను అరికట్టడానికి పోలీసులు నిరంతరం నిఘా ఉంచుతున్నారని, అక్రమాలకు పాల్పడే వారిపై కఠిన చర్యలు తీసుకుంటామని హెచ్చరించారు. స్థానికుల సమాచారం మేరకు ఈ తనిఖీలు చేపట్టడం జరిగింది.
