నిజామాబాద్ బైపాస్ రోడ్డులోని శ్రీ చైతన్య పాఠశాలలో సుమారు 1200 మంది విద్యార్థులకు రోడ్డు భద్రతపై ప్రత్యేక అవగాహన కార్యక్రమం నిర్వహించారు. నిజామాబాద్ ట్రాఫిక్ ఏసీపీ శ్రీ మస్తాన్ అలీ ఆధ్వర్యంలో జరిగిన ఈ కార్యక్రమంలో, మైనర్ డ్రైవింగ్, హెల్మెట్ వాడకం, ట్రిపుల్ రైడింగ్ వంటి అంశాలపై విద్యార్థులకు అవగాహన కల్పించారు.
నిజామాబాద్ ట్రాఫిక్ ఏసీపీ శ్రీ మస్తాన్ అలీ మాట్లాడుతూ, మైనర్ డ్రైవింగ్ వల్ల కలిగే ప్రమాదాలు, ద్విచక్ర వాహనాలు నడిపేటప్పుడు తప్పనిసరిగా హెల్మెట్ ధరించడం, ట్రిపుల్ రైడింగ్ చేయరాదనే నిబంధనలు, మద్యం సేవించి వాహనాలు నడపడం వల్ల సంభవించే ప్రమాదాలు మరియు చట్టపరమైన చర్యల గురించి విద్యార్థులకు వివరించారు. రోడ్డు భద్రతా నియమాలను పాటించడం ద్వారా తమ ప్రాణాలతో పాటు ఇతరుల ప్రాణాలను కూడా కాపాడవచ్చని ఆయన పేర్కొన్నారు.
చిన్న వయస్సులోనే ట్రాఫిక్ నియమాలపై అవగాహన పెంపొందించుకోవాలని, అలాగే తల్లిదండ్రులు మైనర్ పిల్లలకు వాహనాలు ఇవ్వకుండా బాధ్యతాయుతంగా వ్యవహరించాలని ఏసీపీ సూచించారు. ట్రాఫిక్ నియమాల పట్ల ప్రతి ఒక్కరూ బాధ్యతగా వ్యవహరించి ప్రమాద రహిత సమాజ నిర్మాణానికి కృషి చేయాలని ఆయన పిలుపునిచ్చారు.
ఈ అవగాహన కార్యక్రమం ద్వారా విద్యార్థులలో రోడ్డు భద్రతపై అవగాహన పెంచడమే లక్ష్యంగా పెట్టుకున్నట్లు పాఠశాల యాజమాన్యం తెలిపింది. భవిష్యత్తులో ఇలాంటి కార్యక్రమాలను కొనసాగిస్తామని ప్రిన్సిపాల్ శ్రీ గురుచరణ్ తెలిపారు. విద్యార్థులు ఈ కార్యక్రమాన్ని ఎంతో ఆసక్తిగా వీక్షించారు.
ఈ కార్యక్రమంలో పాఠశాల ప్రిన్సిపాల్ శ్రీ గురుచరణ్, ఉపాధ్యాయులు మరియు ఇతర సిబ్బంది పాల్గొన్నారు. సుమారు 1200 మంది విద్యార్థులు ఈ అవగాహన కార్యక్రమంలో పాల్గొన్నారు.
