ప్రజా సమస్యల పరిష్కారం, గ్రామీణాభివృద్ధి, పరిశుభ్రత లక్ష్యంగా జిల్లాలో ప్రత్యేక గ్రామసభలను నిర్వహిస్తున్నట్లు జిల్లా కలెక్టర్ ఆశిష్ సాంగ్వాన్ తెలిపారు. 99 రోజుల కార్యాచరణలో భాగంగా ఈ కార్యక్రమం చేపట్టారు.
ప్రభుత్వ ఆదేశాల మేరకు జిల్లాలోని 532 గ్రామపంచాయతీలలో విడతల వారీగా గ్రామసభలు నిర్వహించేందుకు జిల్లా యంత్రాంగం ప్రత్యేక ఏర్పాట్లు చేసింది. గురువారం 136 గ్రామపంచాయతీలలో ఈ సభలు జరిగాయి. దోమకొండ మండలం గొట్టుముక్కుల గ్రామపంచాయతీలో జరిగిన సభకు కలెక్టర్ స్వయంగా హాజరై గ్రామస్థులతో మాట్లాడారు.
వర్షాకాలాన్ని దృష్టిలో ఉంచుకుని గ్రామాల్లో ముందస్తు పారిశుద్ధ్య చర్యలు చేపట్టాలని కలెక్టర్ సూచించారు. మురికి కాలువల శుభ్రత, తాగునీటి వనరుల సంరక్షణ, వీధి దీపాల నిర్వహణ వంటి అంశాలపై శ్రద్ధ పెట్టాలని, తద్వారా సీజనల్ వ్యాధులను నివారించవచ్చని ఆయన పేర్కొన్నారు.
ఘన వ్యర్థాల నిర్వహణ రూల్స్–2026ను తప్పనిసరిగా అమలు చేయాలని, తడి, పొడి, శానిటరీ వ్యర్థాలను వేర్వేరుగా సేకరించి, శాస్త్రీయ పద్ధతిలో నిర్వహించాలని కలెక్టర్ ఆదేశించారు. ప్రజలకు వ్యర్థాల విభజనపై అవగాహన కల్పించారు.
గ్రామసభలలో తాగునీటి నిర్వహణ, వర్షపు నీటి సంరక్షణ, మొక్కల పెంపకం, పర్యావరణ పరిరక్షణ, విపత్తు నిర్వహణ, ఓటరు జాబితా సవరణ, పంటల మార్పిడి, ఇందిరమ్మ ఇళ్ల ఎంపిక వంటి అంశాలపై అధికారులు ప్రజలకు వివరించారు. ప్రభుత్వ పాఠశాలల్లో విద్యార్థుల నమోదు పెంచాలని, ప్రత్యామ్నాయ పంటల సాగుపై దృష్టి సారించాలని కలెక్టర్ సూచించారు.
