సంగారెడ్డి జిల్లా కలెక్టర్ పి.ప్రావీణ్య, ప్రజావాణి కార్యక్రమంలో స్వీకరించిన 63 దరఖాస్తులను అత్యంత ప్రాధాన్యంతో పరిశీలించి, త్వరితగతిన పరిష్కరించాలని అధికారులను ఆదేశించారు. ప్రజల సమస్యల పరిష్కారంలో ఆలస్యం జరగకూడదని ఆమె స్పష్టం చేశారు.
సోమవారం నిర్వహించిన ప్రజావాణి కార్యక్రమంలో ప్రజలు తమ వివిధ సమస్యలు, వినతులను అధికారులకు సమర్పించారు. వీటిని సంబంధిత శాఖల అధికారులకు పంపించి, తక్షణ చర్యలు తీసుకోవాలని కలెక్టర్ సూచించారు.
జిల్లా నలుమూలల నుండి ప్రజలు నమ్మకంతో తమ సమస్యలను ప్రజావాణి ద్వారా ప్రభుత్వ దృష్టికి తీసుకొస్తున్నారని, వాటి పరిష్కారంలో ఎలాంటి ఆలస్యం జరగకూడదని కలెక్టర్ ప్రావీణ్య అన్నారు. ప్రతి దరఖాస్తును సమగ్రంగా పరిశీలించి, నిర్ణీత గడువులోగా పరిష్కారం చూపాలని ఆమె అధికారులకు సూచించారు.
సంక్షేమం, రెవిన్యూ, వ్యవసాయం, గృహనిర్మాణం, మార్కెటింగ్, ఎంప్లాయ్మెంట్ తదితర శాఖలకు సంబంధించిన వినతులను అధికారులు ప్రత్యేక దృష్టితో తీసుకుని వెంటనే చర్యలు చేపట్టాలని ఆదేశించారు. ప్రజావాణి దరఖాస్తులపై నిర్లక్ష్యం చూపకుండా బాధ్యతాయుతంగా వ్యవహరించాలని ఆమె సూచించారు.
ఈ కార్యక్రమంలో స్థానిక సంస్థల అదనపు కలెక్టర్ పాండు, నారాయణఖేడ్ సబ్ కలెక్టర్ ఉమా హారతి, వివిధ శాఖల జిల్లా అధికారులు, రెవెన్యూ డివిజనల్ అధికారులు, సిబ్బంది పాల్గొన్నారు.
