మెడికల్ కాలేజీల్లో ఫీజుల దందా: విద్యార్థులపై ఏటా రూ.209 కోట్ల అదనపు భారం

నాలుగున్నరేళ్ల కోర్సు వ్యవధికి గాను, కేవలం నాలుగున్నరేళ్ల ఫీజును మాత్రమే వసూలు చేయాలనే నిబంధన ఉన్నప్పటికీ, అనేక మెడికల్ కాలేజీలు ఐదేళ్ల ఫీజును ముక్కుపిండి మరీ వసూలు చేస్తున్నాయి. ఈ విషయంలో ప్రశ్నించే విద్యార్థులను, ప్రాక్టికల్ పరీక్షలలో మార్కులు తగ్గించడం, ఫెయిల్ చేయడం వంటి బెదిరింపులకు పాల్పడుతున్నారని విద్యార్థి సంఘాలు ఆరోపిస్తున్నాయి. ఈ అక్రమాల వెనుక రాజకీయ నాయకులు, ఎంపీలు, ఎమ్మెల్యేల ప్రమేయం ఉందని, వారి ఆధీనంలో ఉన్న కాలేజీలే ఈ దోపిడీకి పాల్పడుతున్నాయని విమర్శలు వినిపిస్తున్నాయి.

ఈ వ్యవహారంపై మెడికో పేరెంట్స్ అసోసియేషన్ కన్నెర్రజేసింది. యూనివర్సిటీ రిజిస్ట్రార్‌కు ఫిర్యాదు చేయడంతో, యూనివర్సిటీ అన్ని మెడికల్ కాలేజీల ప్రిన్సిపాళ్లకు సర్క్యూలర్ జారీ చేసింది. టీఏఎఫ్‌ఆర్‌సీ గైడ్‌లైన్స్‌ను పాటించాలని, లేనిపక్షంలో కఠిన చర్యలు తీసుకుంటామని, కాలేజీ అనుమతిని కూడా రద్దు చేస్తామని హెచ్చరించింది. అయితే, యూనివర్సిటీ హెచ్చరికలను కూడా ఈ కాలేజీలు లెక్కచేయడం లేదని, సర్క్యూలర్ జారీ అయిన కొద్ది రోజులకే ఐదేళ్ల ఫీజు కట్టాలని నోటీసులు జారీ చేశాయని బాధితులు వాపోతున్నారు.

తెలంగాణలో ఎంబీబీఎస్ బీ కేటగిరీలో 2091 మంది, సీ కేటగిరీలో 872 మంది విద్యార్థులు ఉన్నారు. బీ కేటగిరీకి రూ.11.50 లక్షల నుండి రూ.13 లక్షల వరకు, సీ కేటగిరీకి రూ.23 లక్షల నుండి రూ.26 లక్షల వరకు ఫీజు చెల్లిస్తున్నారు. నాలుగున్నరేళ్ల కోర్సుకు ఐదేళ్ల ఫీజు వసూలు చేయడం ద్వారా ప్రైవేటు కాలేజీలు ఏటా రూ.209 కోట్ల వరకు అదనంగా ఆర్జిస్తున్నాయని అంచనా. ఈ అక్రమాలను అరికట్టడంలో ప్రభుత్వం నిర్లక్ష్యంగా వ్యవహరిస్తోందని తల్లిదండ్రులు ఆందోళన వ్యక్తం చేస్తున్నారు.