కీసర మండల కేంద్రంలోని 'బాబా రాందేవ్ జ్యువెలర్స్ అండ్ పాన్ బ్రోకర్'లో అక్రమ తాకట్టు లావాదేవీలు జరుగుతున్నాయని రెవెన్యూ అధికారుల ఆకస్మిక తనిఖీలో వెలుగుచూశాయి. బాధితురాలి ఫిర్యాదుతో రంగంలోకి దిగిన అధికారులు, రికార్డుల్లో భారీ అవకతవకలను గుర్తించారు.
కీసర తాసిల్దార్ కార్యాలయ రెవెన్యూ ఇన్స్పెక్టర్ విశ్వనాథ్ నేతృత్వంలో శనివారం సదరు దుకాణంలో తనిఖీలు నిర్వహించారు. తాకట్టు రికార్డులు, పాన్ టికెట్లు, లావాదేవీల వివరాలను పరిశీలించగా, నిబంధనలకు విరుద్ధంగా వ్యాపారం జరుగుతున్నట్లు ప్రాథమికంగా నిర్ధారణ అయింది.
అధికారులు గుర్తించిన అవకతవకల్లో తాకట్టు పుస్తకాల్లో సరైన వివరాలు నమోదు చేయకపోవడం, స్పష్టమైన వడ్డీ రేట్లు లేకుండా అధిక మొత్తంలో వడ్డీలు వసూలు చేయడం వంటివి ఉన్నాయి. తాకట్టు పెట్టిన బంగారం స్వచ్ఛత, నికర బరువు వంటి కీలక వివరాలను కూడా నమోదు చేయలేదని తేలింది.
బంగారం ప్రస్తుత మార్కెట్ విలువను నమోదు చేయకుండా వినియోగదారులను మోసం చేస్తున్నారని, పాన్ టికెట్ల వెనుక ఉండాల్సిన నిబంధనలు, షరతులు సక్రమంగా లేవని అధికారులు కనుగొన్నారు. తనిఖీ సమయంలో దుకాణ యాజమాన్యం అందుబాటులో లేకపోవడంతో అధికారులు తీవ్ర అసంతృప్తి వ్యక్తం చేశారు.
ఈ వ్యవహారంపై పూర్తి స్థాయి విచారణకు ఆదేశాలు జారీ అయ్యాయి. వచ్చే నెల 2వ తేదీన యాజమాన్యం విచారణకు హాజరుకావాలని సూచించారు. ఈ ఘటనపై మాజీ వార్డు కౌన్సిలర్ పంగ హరిబాబు మాట్లాడుతూ, ఇలాంటి దుకాణాలపై కఠిన చర్యలు తీసుకోవాలని, బాధితులకు న్యాయం చేయాలని డిమాండ్ చేశారు.
