ఆర్ఎస్ఎస్ శతాబ్ది ఉత్సవాల సందర్భంగా గచ్చిబౌలిలో నిర్వహించిన హిందూ సమ్మేళనంలో, ఆధునికతతో పాటు సంస్కృతి, సంప్రదాయాలను కాపాడుకోవాలని, సమాజ ఐక్యతను బలోపేతం చేయాలని పిలుపునిచ్చారు. సుమారు 2000 మంది ఈ కార్యక్రమంలో పాల్గొన్నారు.
గచ్చిబౌలిలోని గోపన్పల్లి తండా బంజారా గ్రౌండ్లో రాష్ట్రీయ స్వయంసేవక్ సంఘ్ (ఆర్ఎస్ఎస్) శతాబ్ది ఉత్సవాల సందర్భంగా హిందూ సమ్మేళనం ఘనంగా జరిగింది. ఈ సమ్మేళనం ద్వారా సమాజంలోని ఐక్యతను పెంపొందించడం, మన మూలాలను కాపాడుకోవడం వంటి అంశాలపై దృష్టి సారించారు.
ఈ కార్యక్రమానికి తెలంగాణ రాష్ట్ర బీజేపీ అధికార ప్రతినిధి రవికుమార్ యాదవ్, గచ్చిబౌలి మాజీ కార్పొరేటర్ గంగాధర్ రెడ్డి ముఖ్య అతిథులుగా హాజరయ్యారు. ఈ సందర్భంగా బ్రహ్మశ్రీ డా. బాచంపల్లి సంతోష్ కుమార్ శాస్త్రి మాట్లాడుతూ, సనాతన ధర్మం కేవలం మతం కాదని, అది జీవన విధానమని, మన సంస్కృతి, సంప్రదాయాలు, నైతిక విలువలకు ప్రతీక అని వివరించారు.
కుటుంబ వ్యవస్థ, గురు-శిష్య పరంపర, పండుగలు, ఆచారాలు సమాజాన్ని బలోపేతం చేసే మూలాలని శాస్త్రి పేర్కొన్నారు. యువత ఈ విలువలను ఆచరించి, భవిష్యత్ తరాలకు అందించాల్సిన బాధ్యతను తీసుకోవాలని ఆయన సూచించారు. గంగాధర్ రెడ్డి మాట్లాడుతూ, ఆధునిక ప్రపంచంలో ముందుకు సాగుతూనే మన సంస్కృతిని కాపాడటం యువత కర్తవ్యమని నొక్కి చెప్పారు.
రవికుమార్ యాదవ్ మాట్లాడుతూ, ఆర్ఎస్ఎస్ శతాబ్ది సందర్భంగా దేశవ్యాప్తంగా ఇలాంటి సమ్మేళనాలు జరుగుతున్నాయని, కుల, వర్గ భేదాలను తొలగించి సమాజాన్ని ఏకం చేయడం దీని ప్రధాన లక్ష్యమని తెలిపారు. "గడపలోపల కులం – గడప దాటితే హిందువులం" అనే నినాదం సభలో ప్రతిధ్వనించింది. సుమారు 2000 మంది ప్రజలు పాల్గొన్న ఈ కార్యక్రమంలో సాంస్కృతిక కార్యక్రమాలు, అన్నదానం నిర్వహించారు.
