కామారెడ్డి జిల్లాలో అటవీ సంరక్షణపై కలెక్టర్ సమీక్ష

జిల్లా కలెక్టర్ ఆశిష్ సంగ్వాన్ మాచారెడ్డి ఫారెస్ట్ రేంజ్ కార్యాలయాన్ని సందర్శించి, అటవీ శాఖ అధికారులు నిర్వహిస్తున్న కార్యకలాపాల గురించి తెలుసుకున్నారు. అటవీ ప్రాంతాల్లో వన్యప్రాణుల సంచారాన్ని గుర్తించే పద్ధతులు, అటవీ సంరక్షణ, పర్యవేక్షణపై అధికారులు వివరణ ఇచ్చారు.

అటవీ అగ్నిప్రమాదాల నివారణకు ఉపయోగించే ఫైర్ ఎక్విప్‌మెంట్‌ను కలెక్టర్ పరిశీలించారు. అగ్నిప్రమాదాలు సంభవించినప్పుడు వాటిని నియంత్రించే చర్యలు, ఫైర్ లైన్స్ ఏర్పాటు, వేగవంతమైన స్పందన విధానాలపై అధికారులు అవగాహన కల్పించారు.

ఈ సందర్భంగా కలెక్టర్ మాట్లాడుతూ, గ్రామీణ అటవీ ప్రాంతాల్లో అడవుల సంరక్షణకు ప్రజల భాగస్వామ్యం అత్యంత అవసరమని పేర్కొన్నారు. అటవీ అధికారులు ప్రజలతో సమన్వయం పెంచుకుని వన్యప్రాణి సంరక్షణ, అటవీ భద్రతపై దృష్టి సారించాలని సూచించారు.

అటవీ శాఖ చేపడుతున్న కార్యక్రమాలను సమర్థవంతంగా అమలు చేస్తే గ్రామీణ ప్రజలకు పర్యావరణ పరిరక్షణతో పాటు అనేక ప్రయోజనాలు చేకూరుతాయని కలెక్టర్ తెలిపారు. ఈ కార్యక్రమంలో అటవీ శాఖ అధికారులు, సిబ్బంది పాల్గొన్నారు.