11 లక్షల డీల్ వివాదం: చాముండేశ్వరి హత్య కేసులో సీఐ వెంకటరమణ సస్పెండ్

పల్నాడు జిల్లాలో చాముండేశ్వరి హత్య కేసులో కీలక పరిణామం చోటుచేసుకుంది. ప్రేమ వివాహం చేసుకున్న యువతి చాముండేశ్వరి వ్యవహారంలో లంచం తీసుకున్నారనే ఆరోపణలపై మాచర్ల టౌన్ సీఐ తురక వెంకటరమణను జిల్లా ఎస్పీ కృష్ణారావు సస్పెండ్ చేస్తూ ఉత్తర్వులు జారీ చేశారు. బాధితురాలికి రక్షణ కల్పించాల్సిన బాధ్యత ఉన్న పోలీస్ అధికారి, ఆమె తల్లిదండ్రులతో ఒప్పందం కుదుర్చుకుని యువతిని వారికి అప్పగించినట్లు విచారణలో తేలడంతో ఈ చర్యలు తీసుకున్నారు.

చాముండేశ్వరి అనే యువతి నాగరాజు అనే యువకుడిని ప్రేమించి వివాహం చేసుకుంది. తన కుటుంబ సభ్యుల నుంచి ప్రాణహాని ఉందని భావించిన ఆమె మాచర్ల పోలీస్ స్టేషన్‌ను ఆశ్రయించి రక్షణ కోరింది. అయితే, అక్కడ విధుల్లో ఉన్న సీఐ వెంకటరమణ, బాధితురాలికి సహాయం చేయాల్సిన స్థానంలో ఆమె తల్లిదండ్రులతో రహస్యంగా ఒప్పందం కుదుర్చుకున్నారని ఆరోపణలు వెలువడ్డాయి.

చాముండేశ్వరిని తిరిగి తల్లిదండ్రులకు అప్పగించేందుకు సుమారు 11 లక్షల రూపాయల డీల్ జరిగినట్లు విచారణలో వెల్లడైంది. ఆ డబ్బు పంపకాల విషయంలో పోలీసుల మధ్య వివాదం తలెత్తడంతో ఈ విషయం బయటకు వచ్చినట్లు సమాచారం. అనంతరం ఉన్నతాధికారులు చేపట్టిన విచారణలో సీఐ పాత్ర స్పష్టంగా తేలడంతో ఆయనపై సస్పెన్షన్ వేటు పడింది.

సీఐ వెంకటరమణకు గతంలోనూ వివాదాస్పద ఇమేజ్ ఉన్నట్లు తెలుస్తోంది. 2012లో కోట పోలీస్ స్టేషన్‌లో ఎస్సైగా పనిచేస్తున్న సమయంలో జరిగిన సంఘటనల నేపథ్యంలో ప్రముఖ దినపత్రిక ఆయనపై “గబ్బర్ సింగ్ వెంకటరమణ” అనే శీర్షిక ప్రచురితమైనట్లు సమాచారం. అప్పటి నుంచి స్థానికంగా ఆయనకు ‘గబ్బర్ సింగ్’ అనే పేరు ప్రాచుర్యంలోకి వచ్చినట్లు పోలీసు వర్గాలు చెబుతున్నాయి. సీఐ వెంకటరమణపై గతంలోనూ వివిధ ప్రాంతాల్లో విధులు నిర్వహించే సమయంలో అక్రమ వసూళ్లకు పాల్పడ్డారని ఆరోపణలు వచ్చినట్లు తెలుస్తోంది. పలుమార్లు సస్పెన్షన్ ఎదుర్కొన్నప్పటికీ తిరిగి పోస్టింగ్ వచ్చిన తర్వాత కూడా అదే విధంగా వ్యవహరించారని స్థానిక వర్గాలు పేర్కొంటున్నాయి. తాజా చాముండేశ్వరి హత్య కేసులో ఆయన ప్రవర్తన తీవ్ర విమర్శలకు దారితీసింది. ఈ కేసుపై ప్రస్తుతం ఉన్నతాధికారుల పర్యవేక్షణలో మరింత లోతైన విచారణ కొనసాగుతోంది. బాధితురాలి మరణానికి కారణమైన పరిస్థితులపై పూర్తి వివరాలు వెలుగులోకి వచ్చే అవకాశం ఉందని అధికారులు తెలిపారు.