కేంద్ర హోంశాఖ సహాయ మంత్రి బండి సంజయ్ కుమారుడు భగీరథ్పై నమోదైన పోక్సో కేసులో కొత్త మలుపు చోటుచేసుకుంది. హైదరాబాద్లోని పలు ప్రాంతాల్లో ఆయనకు వ్యతిరేకంగా పోస్టర్లు వెలువడగా, విచారణకు హాజరుకావాల్సిన సమయానికి ఆయన గైర్హాజరయ్యారు.
శేరిలింగంపల్లి నియోజకవర్గ పరిధిలోని గచ్చిబౌలి ఫ్లైఓవర్, నలగండ్ల ఫ్లైఓవర్ మరియు మున్సిపల్ జోనల్ కార్యాలయాల వద్ద గుర్తు తెలియని వ్యక్తులు "మైనర్ బాలికపై లైంగిక వేధింపుల కేసులో బండి భగీరథ్ పరారీ" అని పేర్కొంటూ పోస్టర్లను అంటించారు. ఈ పోస్టర్లు నగరంలో తీవ్ర చర్చనీయాంశంగా మారాయి.
పోలీసులు జారీ చేసిన నోటీసుల ప్రకారం, భగీరథ్ బుధవారం మధ్యాహ్నం 2 గంటలకు పేట్బషీరాబాద్ పోలీసు స్టేషన్లో విచారణకు హాజరుకావాల్సి ఉంది. అయితే, ఆయన నిర్దేశిత సమయానికి హాజరుకాకపోవడంతో పోలీసులు తదుపరి చట్టపరమైన చర్యలపై దృష్టి సారించారు.
భగీరథ్ను వెంటనే అరెస్ట్ చేయాలని డిమాండ్ చేస్తూ మహిళా సంఘాలు పేట్బషీరాబాద్ పోలీస్ స్టేషన్ ముందు నిరసన చేపట్టాయి. మెట్రో రైళ్లలో కూడా కొందరు పోస్టర్లను ప్రదర్శిస్తూ, నిందితుడిని రిమాండ్కు తరలించాలని కోరడం గమనార్హం. 17 ఏళ్ల మైనర్ బాలికపై లైంగిక వేధింపులకు పాల్పడ్డారనే ఫిర్యాదుతో గత శుక్రవారం భగీరథ్పై పోలీసులు కేసు నమోదు చేశారు. బాధితురాలి వాంగ్మూలం ఆధారంగా పోక్సో చట్టంలోని కఠిన సెక్షన్లను కూడా కేసులో చేర్చారు.
భగీరథ్ విచారణకు హాజరుకాకపోవడం, ఆయనపై వెలువడిన పోస్టర్ల నేపథ్యంలో ఈ కేసు తీవ్రతరం అయ్యే అవకాశం ఉంది. పోలీసులు ఈ వ్యవహారంపై మరింత లోతుగా దర్యాప్తు చేసే అవకాశం ఉంది.
