5 కిలోల గ్యాస్ సిలిండర్లు అందుబాటులోకి: అద్దె ఇళ్ల వారికి వరం

ఇంధన రంగంలో వస్తున్న మార్పులకు అనుగుణంగా, వినియోగదారుల అవసరాలను తీర్చడానికి గ్యాస్ కంపెనీలు కొత్తగా 5 కిలోల గ్యాస్ సిలిండర్లను అందుబాటులోకి తెచ్చాయి. ఇప్పటివరకు 14.2 కిలోల గృహ వినియోగ సిలిండర్లు, 19 కిలోల వాణిజ్య సిలిండర్లు మాత్రమే అందుబాటులో ఉండేవి. ఇప్పుడు చిన్న కుటుంబాలకు, తక్కువ అవసరాలున్న వారికి ఈ చిన్న సిలిండర్లు ప్రత్యామ్నాయంగా మారనున్నాయి.

ఈ 5 కిలోల సిలిండర్ల ప్రధాన ఆకర్షణ వాటిని పొందడానికి చిరునామా రుజువు అవసరం లేకపోవడం. కేవలం గుర్తింపు కార్డును సమర్పించి, వినియోగదారులు తమ సమీపంలోని గ్యాస్ ఏజెన్సీల నుండి వీటిని పొందవచ్చు. ఈ సౌలభ్యం వలస కార్మికులు, విద్యార్థులకు ఎంతో ఉపకరిస్తుంది. సిలిండర్ రీఫిల్లింగ్ కూడా సులభంగా అందుబాటులో ఉంటుందని కంపెనీలు పేర్కొన్నాయి.

ఇండియన్ ఆయిల్ కార్పొరేషన్ 'ఛోటు' పేరుతో ఈ చిన్న సిలిండర్లను మార్కెట్లోకి విడుదల చేసింది. వీటిని పెట్రోల్ బంకులు, కిరాణా దుకాణాలు, సూపర్ మార్కెట్లు, ఇండేన్ పంపిణీదారుల వద్ద కొనుగోలు చేయవచ్చు. భారత్ గ్యాస్ 'మినీ సిలిండర్' కోసం ప్రత్యేక ఫోన్ నంబర్ (1800224344) అందుబాటులో ఉంది, దీని ద్వారా రెండు గంటల్లో డెలివరీ పొందవచ్చు. హెచ్‌పీ గ్యాస్ 'అప్పు' పేరుతో 5 కిలోల సిలిండర్లను విక్రయ కేంద్రాలు, కిరాణా దుకాణాల్లో అందుబాటులోకి తెచ్చింది.