ప్రపంచవ్యాప్తంగా నెలకొన్న ఆర్థిక అనిశ్చితి నేపథ్యంలో, దేశ ఆర్థిక స్థిరత్వాన్ని పరిరక్షించడానికి ప్రజలు తమ ఖర్చులను తగ్గించుకోవాలని, ముఖ్యంగా బంగారం కొనుగోళ్లను తాత్కాలికంగా నిలిపివేయాలని ప్రధాని నరేంద్ర మోదీ పిలుపునిచ్చారు. హైదరాబాద్లో జరిగిన బీజేపీ బహిరంగ సభలో ఆయన ఈ సూచనలు చేశారు.
అంతర్జాతీయంగా నెలకొన్న యుద్ధ వాతావరణం, ముడి చమురు ధరల పెరుగుదల వంటి అంశాలు భారత ఆర్థిక వ్యవస్థపై ఒత్తిడి పెంచుతున్నాయని ప్రధాని నరేంద్ర మోదీ అన్నారు. ఈ పరిస్థితుల్లో దేశ ప్రజలు బాధ్యతాయుతంగా వ్యవహరించి, అనవసర ఖర్చులను తగ్గించుకోవాలని ఆయన విజ్ఞప్తి చేశారు.
భారతదేశం అధికంగా బంగారం దిగుమతి చేసుకునే దేశాలలో ఒకటి కావడంతో, ఇది విదేశీ మారక నిల్వలపై తీవ్ర ప్రభావాన్ని చూపుతోందని ప్రధాని తెలిపారు. అందువల్ల, పండుగలు, శుభకార్యాల సందర్భంగా అధికంగా బంగారం కొనుగోలు చేయకుండా, కొంతకాలం ఈ అలవాటును నియంత్రించుకోవాలని ఆయన ప్రజలను కోరారు. గతంలో దేశం సంక్షోభాల్లో ఉన్నప్పుడు ప్రజలు బంగారం దానం చేసి ఆదుకున్నారని, ఇప్పుడు కొనుగోళ్లు తగ్గించి దేశానికి సహకరించాలని ఆయన సూచించారు.
ఇంధన వినియోగాన్ని తగ్గించుకోవాల్సిన ఆవశ్యకతను ప్రధాని నొక్కి చెప్పారు. వ్యక్తిగత వాహనాల వినియోగాన్ని తగ్గించి, ప్రజా రవాణా వ్యవస్థలను, ముఖ్యంగా మెట్రో రైళ్లు, బస్సులను ఎక్కువగా ఉపయోగించాలని ఆయన సూచించారు. ఎలక్ట్రిక్ వాహనాల వినియోగాన్ని ప్రోత్సహించాలని, కార్ పూలింగ్ అలవాటు చేసుకోవాలని, సరుకు రవాణాలో గూడ్స్ ట్రైన్లను ప్రోత్సహించాలని పిలుపునిచ్చారు. ఇంధన ఆదా దేశ ఆర్థిక వ్యవస్థ పరిరక్షణలో కీలకమని ఆయన అభిప్రాయపడ్డారు.
స్వదేశీ ఉత్పత్తులకు ప్రాధాన్యం ఇవ్వాలని, విదేశీ వస్తువులపై ఆధారపడటాన్ని తగ్గించాలని ప్రధాని పిలుపునిచ్చారు. దేశీయ ఉత్పత్తులను ప్రోత్సహించడం ద్వారా భారత ఆర్థిక వ్యవస్థ మరింత బలోపేతం అవుతుందని ఆయన విశ్వాసం వ్యక్తం చేశారు. విదేశీ టూర్లు, విలాసవంతమైన ఖర్చులను వాయిదా వేసుకోవాలని, విదేశీ మారక ద్రవ్య వినియోగాన్ని తగ్గించడం అత్యవసరమని పేర్కొన్నారు. రైతులు రసాయన ఎరువుల వాడకాన్ని తగ్గించి, సేంద్రీయ వ్యవసాయాన్ని ప్రోత్సహించాలని, భూసారాన్ని కాపాడాలని సూచించారు.
