తెలంగాణ విద్యా విధాన నివేదికపై టీపీటీఎఫ్ ఆగ్రహం: ఉద్యమానికి సిద్ధం

టీపీటీఎఫ్ జిల్లా అధ్యక్షుడు చింతల లింగం మాట్లాడుతూ, నివేదికలో కొన్ని సానుకూల అంశాలు ఉన్నప్పటికీ, ప్రస్తుత విద్యా వ్యవస్థను బలహీనపరిచేలా ఉన్నాయని విమర్శించారు. మండలానికి రెండు, మూడు "తెలంగాణ పబ్లిక్ స్కూల్స్" ఏర్పాటు చేసి, ఒక్కో పాఠశాలలో 1500 మంది విద్యార్థులతో నిర్వహించాలనే ప్రతిపాదన ఆచరణాత్మకం కాదని, ఇది మౌలిక సదుపాయాలను మెరుగుపరచాలనే లక్ష్యానికి విరుద్ధమని పేర్కొన్నారు.

ఉపాధ్యాయుల నియామకాలపై స్పష్టత లేకపోవడం, మారుమూల ప్రాంతాల పాఠశాలల మూసివేతకు సంబంధించిన సిఫార్సులు పేద విద్యార్థుల విద్యకు ఆటంకం కలిగిస్తాయని టీపీటీఎఫ్ ఆందోళన వ్యక్తం చేసింది. వేతనాలు అధికమని పేర్కొనడం హాస్యాస్పదమని, వేతనాలు శాస్త్రీయ ప్రమాణాల ఆధారంగా నిర్ణయించబడతాయని స్పష్టం చేశారు.

పదోన్నతుల్లో ఉన్న సమస్యలను పరిష్కరించకుండా ఏకపక్షంగా సిఫార్సులు చేయడం సరికాదని టీపీటీఎఫ్ జిల్లా ప్రధాన కార్యదర్శి సిహెచ్ శ్రీనివాస్ రెడ్డి అన్నారు. ఈ సిఫార్సులను వ్యతిరేకిస్తూ, ఇతర ఉపాధ్యాయ సంఘాలతో కలిసి తమ నిరసనను తెలియజేస్తామని ఆయన తెలిపారు. విద్యా విధాన రూపకల్పనలో ఉపాధ్యాయుల అభిప్రాయాలకు విలువ ఇవ్వాలని వారు డిమాండ్ చేశారు.