కామారెడ్డి, 2026-07-04
వామపక్ష విద్యార్థి సంఘాల ఐక్య కార్యాచరణ కమిటీ ఆధ్వర్యంలో శుక్రవారం కామారెడ్డిలో నిర్వహించిన మీడియా సమావేశంలో కీలక నిర్ణయాలు తీసుకున్నారు. విద్యారంగ సమస్యల పరిష్కారం కోసం జూలై 10న తెలంగాణ రాష్ట్రవ్యాప్తంగా విద్యాసంస్థలను మూసివేయాలని సంఘాలు పిలుపునిచ్చాయి.
కామారెడ్డి జిల్లా కేంద్రంలోని ఆర్ అండ్ బి అతిథి గృహంలో వామపక్ష విద్యార్థి సంఘాల ఐక్య కార్యాచరణ కమిటీ ఆధ్వర్యంలో శుక్రవారం మీడియా సమావేశం నిర్వహించారు. ఈ సందర్భంగా నాయకులు మాట్లాడుతూ విద్యారంగంలో నెలకొన్న సమస్యలను పరిష్కరించాలని డిమాండ్ చేస్తూ జూలై 10న తెలంగాణ రాష్ట్రవ్యాప్తంగా విద్యాసంస్థల బంద్ను విజయవంతం చేయాలని పిలుపునిచ్చారు. ఈ బంద్కు విద్యార్థులు, ప్రభుత్వ, ప్రైవేట్ విద్యాసంస్థలు, ప్రజాస్వామికవాదులు, అన్ని వర్గాల ప్రజలు మద్దతు తెలిపి భాగస్వాములు కావాలని కోరారు.
విద్యార్థి సంఘాలు తమ ప్రధాన డిమాండ్లను వెల్లడిస్తూ రాష్ట్రంలో ప్రభుత్వ పాఠశాలల మూసివేత నిర్ణయాన్ని ఉపసంహరించుకోవాలని, ప్రభుత్వ విద్యా వ్యవస్థను బలోపేతం చేయాలని కోరాయి. ప్రైవేట్, కార్పొరేట్ విద్యాసంస్థల ఫీజులను నియంత్రించే సమగ్ర చట్టం తీసుకురావాలని, పెండింగ్లో ఉన్న స్కాలర్షిప్లు, ఫీజు రీయింబర్స్మెంట్, బెస్ట్ అవైలబుల్ స్కీమ్ బకాయిలను వెంటనే విడుదల చేయాలని డిమాండ్ చేశాయి. అలాగే విద్యా హక్కు చట్టాన్ని పకడ్బందీగా అమలు చేయడంతో పాటు నిబంధనలు పాటించని ప్రైవేట్ విద్యాసంస్థలపై చర్యలు తీసుకోవాలని, విద్యారంగానికి అధిక నిధులు కేటాయించాలని, మెగా డీఎస్సీ నిర్వహించి ఖాళీ టీచింగ్, నాన్-టీచింగ్ పోస్టులను భర్తీ చేయాలని, ప్రభుత్వ విద్యాసంస్థల్లో మౌలిక వసతులు కల్పించాలని కోరారు.
ఈ సమావేశంలో పీడీఎస్యూ రాష్ట్ర కార్యదర్శి జి. సురేష్, ఏఐఎఫ్డీఎస్ రాష్ట్ర కార్యదర్శి జబ్బర్, ఏఐఎస్ఎఫ్ నాయకులు శివ, సంపత్, ఎస్ఎఫ్ఐ జిల్లా నాయకుడు నితిన్, ఏఐఎస్బీ నాయకుడు నిఖిల్ గౌడ్, రోహిత్, శ్రీకాంత్ తదితరులు పాల్గొన్నారు.
