జగిత్యాల జిల్లాలోని కొండగట్టు పుణ్యక్షేత్రంలో జరగనున్న చిన్న హనుమాన్ జయంతి సందర్భంగా భక్తులకు ఎలాంటి ఇబ్బందులు కలగకుండా, ప్రశాంతమైన ఆధ్యాత్మిక వాతావరణాన్ని కల్పించేందుకు పోలీసులు పటిష్టమైన భద్రతా ఏర్పాట్లు చేశారు. సుమారు 914 మంది పోలీసు సిబ్బందితో బందోబస్తును పర్యవేక్షించనున్నారు.
జిల్లా ఎస్పీ అశోక్ కుమార్ ఆదేశాల మేరకు, కొండగట్టు ఆంజనేయ స్వామి సన్నిధిలో చిన్న హనుమాన్ జయంతిని పురస్కరించుకుని విస్తృతమైన భద్రతా చర్యలు చేపట్టారు. భక్తులు స్వామి వారిని నిర్విఘ్నంగా దర్శించుకునేలా, ఆధ్యాత్మిక వాతావరణానికి భంగం కలగకుండా అన్ని రకాల ఏర్పాట్లు చేశారు.
భద్రతా ఏర్పాట్లలో భాగంగా, మొత్తం పోలీసు సిబ్బందిని 5 సెక్టార్లుగా విభజించి, 3 షిఫ్టుల విధానంలో విధులను కేటాయించారు. సీసీ కెమెరాల ద్వారా నిరంతర పర్యవేక్షణ కొనసాగుతుందని అధికారులు తెలిపారు. ఎలాంటి అవాంఛనీయ సంఘటనలు జరగకుండా అప్రమత్తంగా ఉండాలని పోలీసులకు సూచనలు జారీ చేశారు.
ఈ జయంతి సందర్భంగా పెద్ద సంఖ్యలో భక్తులు తరలివచ్చే అవకాశం ఉన్నందున, వారికి ఎటువంటి అసౌకర్యం కలగకుండా చూడాలని, ఓపికతో సలహాలు, సూచనలు అందించాలని ఎస్పీ సిబ్బందిని కోరారు. ముఖ్యంగా క్యూ లైన్ల నిర్వహణ, మాల విరమణ స్థలాల వద్ద ప్రత్యేక శ్రద్ధ వహించాలని ఆదేశించారు. 24 గంటలూ పోలీస్ నిఘా కొనసాగుతుంది.
వాహనాల పార్కింగ్, ట్రాఫిక్ నియంత్రణకు కూడా ప్రత్యేక చర్యలు తీసుకున్నారు. అధిక సంఖ్యలో వచ్చే వాహనాలను క్రమపద్ధతిలో పార్కింగ్ చేసేలా ఏర్పాట్లు చేశారు. ట్రాఫిక్ జామ్ కాకుండా జాగ్రత్తలు తీసుకుంటూ, రాత్రి వేళల్లో ప్రమాదాలు నివారించడానికి స్టాపర్స్, కోన్స్ వంటివి ఏర్పాటు చేశారు. కాలి నడకన వచ్చే భక్తులు రోడ్డుపై వెళ్లే వాహనాలను గమనిస్తూ జాగ్రత్తగా నడవాలని సూచించారు. వారి బ్యాగులు, జెండాలకు రేడియం స్టిక్కర్లు అమర్చారు.
