వాణిజ్య పన్నుల శాఖ అటెండర్ కొండపల్లి శ్రీనివాసరావు ఇంట్లో ఆదాయానికి మించిన ఆస్తులు బయటపడ్డాయి. అవినీతి నిరోధక శాఖ (ACB) అధికారులు సోదాలు నిర్వహించి, భారీ మొత్తంలో బంగారం, వెండి, నగదు, ఆస్తులను స్వాధీనం చేసుకున్నారు.
విజయవాడలో వాణిజ్య పన్నుల శాఖకు చెందిన అటెండర్ కొండపల్లి శ్రీనివాసరావు ఇంట్లో ACB అధికారులు ఆకస్మిక దాడులు నిర్వహించారు. ఈ దాడుల్లో శ్రీనివాసరావు ఆదాయానికి మించిన ఆస్తులు కలిగి ఉన్నట్లు నిర్ధారించారు. అతని నివాసంతో పాటు, బంధువుల ఇళ్లలోనూ సోదాలు జరిగాయి.
సోదాల్లో భాగంగా, 760 గ్రాముల బంగారం, 5 గోల్డ్ బిస్కెట్లు, 7.8 కిలోల వెండి ఆభరణాలు స్వాధీనం చేసుకున్నారు. బ్యాంకు ఖాతాల్లో రూ. 22 లక్షల నగదు ఉన్నట్లు గుర్తించారు. దీంతో పాటు, ఖరీదైన భవనం, ఖాళీ స్థలాలు కూడా ACB అధికారుల దృష్టికి వచ్చాయి. మొత్తం ఆస్తుల విలువ రూ. 2 కోట్లకు పైనే ఉంటుందని అంచనా.
శ్రీనివాసరావు బెదిరించి డబ్బులు వసూలు చేస్తున్నట్లు ACBకి ఫిర్యాదులు అందినట్లు సమాచారం. ఈ ఆరోపణల నేపథ్యంలోనే అధికారులు ఈ చర్యలు తీసుకున్నట్లు తెలుస్తోంది. ACB అధికారులు శ్రీనివాసరావును అదుపులోకి తీసుకుని, కేసు నమోదు చేసి దర్యాప్తు ప్రారంభించారు.
ఈ కేసులో మరిన్ని వివరాలు వెల్లడి కావాల్సి ఉంది. ACB అధికారులు దర్యాప్తును ముమ్మరం చేశారు.
