కర్ణాటక రాష్ట్రంలోని కలబురిగి జిల్లాలో అప్పు ఇచ్చిన సొమ్మును తిరిగి అడిగినందుకు ఒక ఉపాధ్యాయురాలిని హత్య చేసిన ఘటన కలకలం సృష్టించింది. పోలీసులు నిందితుడిని అదుపులోకి తీసుకున్నారు.
కర్ణాటక రాష్ట్రం, కలబురిగి జిల్లా, కమలాపూర్ తాలూకా పరిధిలోని కల్ముడా గ్రామంలో ఈ దారుణం జరిగింది. బీదర్ జిల్లా, భాల్కి తాలూకా, వందేర్ ఖేడా గ్రామానికి చెందిన జ్యోతి కపాలే (57) అనే ఉపాధ్యాయురాలు, తన పరిచయస్తుడైన ఒక వ్యక్తికి సుమారు రూ. 14 లక్షలు అప్పుగా ఇచ్చారు.
కాలక్రమేణా అప్పు తిరిగి రాకపోవడంతో, జ్యోతి ఆ వ్యక్తిని నిలదీశారు. ఈ విషయంలో ఇరువురి మధ్య వివాదం చెలరేగింది. అప్పు తిరిగి అడగడాన్ని సహించలేని నిందితుడు, జ్యోతిని హత్య చేయాలని పథకం రచించాడు.
కలబురిగిలో తన కుటుంబ సభ్యులను కలిసేందుకు వెళ్తున్న జ్యోతిపై నిందితుడు దాడి చేసి, అతి కిరాతకంగా హత్య చేశాడు. అనంతరం, నేరం జరిగిన ఆనవాళ్లను తొలగించే ప్రయత్నంలో భాగంగా, మృతదేహాన్ని కాల్చి బూడిద చేసినట్లు సమాచారం.
ఈ ఘటనపై స్థానిక పోలీసులు కేసు నమోదు చేసుకుని దర్యాప్తు ప్రారంభించారు. విచారణలో భాగంగా నిందితుడు ఆనంద్ ను అదుపులోకి తీసుకున్నట్లు అధికారులు వెల్లడించారు.
