కామారెడ్డి జిల్లాలో ఎక్సైజ్ అధికారులు చేపట్టిన దాడుల్లో 220 గ్రాముల నిషేధిత ఆల్ప్రాజోలం స్వాధీనం చేసుకున్నారు. ఈ వ్యవహారంలో ముగ్గురు వ్యక్తులను అరెస్ట్ చేసి, వారిపై NDPS చట్టం కింద కేసులు నమోదు చేశారు.
కామారెడ్డి జిల్లా ఎక్సైజ్ అధికారులు, టాస్క్ ఫోర్స్ బృందాలు సంయుక్తంగా దాడులు నిర్వహించి, నిషేధిత మత్తు పదార్థాలను స్వాధీనం చేసుకున్నాయి. నమ్మదగిన సమాచారం మేరకు ఈ దాడులు జరిగినట్లు అధికారులు తెలిపారు.
బొంపల్లి గ్రామ శివారులో గడిపల్లి శ్రీకాంత్ గౌడ్ వద్ద 4 గ్రాముల ఆల్ప్రాజోలం దొరకగా, అతని సమాచారంతో నాగిరెడ్డిపేట మండలం బొల్లారం గ్రామానికి చెందిన ఇగురం రాజేందర్ గౌడ్ వద్ద 110 గ్రాములు, జలాల్పూర్కు చెందిన గడ్డం మాణిక్యం గౌడ్ వద్ద 106 గ్రాముల ఆల్ప్రాజోలం స్వాధీనం చేసుకున్నారు. మొత్తం 220 గ్రాముల నిషేధిత మత్తు పదార్థం లభించింది.
అరెస్ట్ అయిన ముగ్గురు నిందితులపై NDPS చట్టం కింద కేసులు నమోదు చేసి, వారిని రిమాండ్కు తరలించినట్లు అధికారులు వెల్లడించారు. ఈ దాడుల్లో ఎక్సైజ్ మరియు టాస్క్ ఫోర్స్ అధికారులు పాల్గొన్నారు.
నిషేధిత మత్తు పదార్థాల సరఫరాపై ఉమ్మడి నిజాంబాద్ జిల్లాలో ఎక్సైజ్ శాఖ నిఘా పెంచింది. ఇలాంటి కార్యకలాపాలపై కఠిన చర్యలు తీసుకుంటామని అధికారులు తెలిపారు.
