అంబేద్కర్ జయంతి వేడుకలతో పాటు రోడ్డు భద్రతపై ప్రతిజ్ఞ - గోదావరిఖనిలో ఘనంగా నిర్వహణ

రామగుండం పోలీస్ కమీషనరేట్ ఆధ్వర్యంలో గోదావరిఖని మున్సిపాలిటీ జంక్షన్ చౌరస్తా వద్ద అంబేద్కర్ జయంతి వేడుకలు నిర్వహించారు. ఈ కార్యక్రమంలో రాష్ట్ర ఐటీ, పరిశ్రమలు & వాణిజ్యశాఖ మంత్రి దుద్దిళ్ల శ్రీధర్ బాబు, రామగుండం పోలీస్ కమిషనర్ అంబర్ కిషోర్ ఝా, ఎమ్మెల్యే మక్కన్ సింగ్ రాజ్ ఠాకూర్, అడిషనల్ కలెక్టర్ అరుణ శ్రీ, మున్సిపల్ మేయర్ మహంకాళి స్వామి తదితరులు పాల్గొన్నారు.

రాష్ట్ర ప్రభుత్వం నిర్వహిస్తున్న 99 రోజుల ప్రజాపాలన ప్రగతి నివేదిక కార్యక్రమంలో భాగంగా ఏప్రిల్ 13 నుండి 18 వరకు 'అరైవ్ & అలైవ్' రోడ్డు భద్రత వారోత్సవాలు జరుగుతున్నాయి. ఈ వారోత్సవాల్లో భాగంగా ప్రజలకు రహదారి భద్రతపై అవగాహన కల్పించారు.

ముఖ్య అతిథులు మాట్లాడుతూ, రహదారి భద్రత నిబంధనలను పాటించడం ప్రతి వాహనదారుడి బాధ్యత అని, సురక్షితంగా గమ్యస్థానాలకు చేరుకోవాలని సూచించారు. ప్రభుత్వం రహదారులను మెరుగుపరిచినప్పటికీ, వాహనదారులు క్రమశిక్షణతో, అవగాహనతో నడపాలని కోరారు.

ఈ కార్యక్రమంలో పాల్గొన్న ప్రజలు, మహిళలు, ఆటో డ్రైవర్లు రహదారి భద్రతపై ప్రతిజ్ఞ చేశారు. మోటారు వాహన చట్టంలోని నిబంధనలను పాటిస్తూ, ఇతరులకు అవగాహన కల్పిస్తూ, ప్రమాదాలు జరగకుండా బాధ్యతగా వ్యవహరిస్తామని ప్రమాణం చేశారు.