MS లాంగర్ బీడీ కంపెనీ పరిధిలోని వివిధ బీడీ సెంటర్లలో పనిచేస్తున్న బీడీ కట్టలకు బుర్రలు (బాక్సులు) పెట్టే కార్మికుల వేతనాలను నెలకు రూ. 26,000కు పెంచాలని తెలంగాణ బహుళ జన బీడీ కార్మిక సంఘం (బీఎల్ టీయూ) రాష్ట్ర అధ్యక్షుడు ఎస్. సిద్ధరాములు డిమాండ్ చేశారు. అలాగే, సమాన పనికి సమాన వేతనం అందించాలని, యాజమాన్యం వేధింపులు ఆపాలని కోరారు.
కామారెడ్డి జిల్లా పాల్వంచ మండల కేంద్రంలో తెలంగాణ బహుళ జన బీడీ కార్మిక సంఘం (బీఎల్ టీయూ) రాష్ట్ర కమిటీ ఆధ్వర్యంలో జరిగిన రాష్ట్ర సదస్సులో ఈ డిమాండ్లు వినిపించాయి. ఈ సదస్సుకు కామారెడ్డి జిల్లా నాయకులు కుమ్మరి రవి అధ్యక్షత వహించారు. MS లాంగర్ నిజామాబాద్ హెడ్ ఆఫీసు పరిధిలో పనిచేస్తున్న బీడీ కట్టలకు బుర్రలు పెట్టే కార్మికులకు, యాజమాన్యంతో బీఎల్ టీయూ రాష్ట్ర కమిటీ చేసుకున్న వేతన ఒప్పందం ఏప్రిల్ 30, 2026న ముగుస్తుందని తెలిపారు.
ఈ నేపథ్యంలో, కార్మికుల వేతనాలను నెలకు రూ. 26,000కు పెంచాలని, సమాన పనికి సమాన వేతనం అందించాలని, కంపెనీ మేనేజర్లు కార్మికులను వేధించడం మానుకోవాలని సిద్ధరాములు కోరారు. బీడీ సెంటర్లలో బీడీ ప్యాకర్లతో సమానంగా బీడీ కట్టలకు బుర్రలు పెట్టే కార్మికులను కూడా భర్తీ చేయాలని ఆయన డిమాండ్ చేశారు. ఈ డిమాండ్లను యాజమాన్యం తక్షణమే పరిష్కరించాలని ఆయన కోరారు.
ఈ కార్యక్రమంలో బీఎల్ టీయూ రాష్ట్ర ప్రధాన కార్యదర్శి ఎం. అంజనేయులు, పాల్వంచ గ్రామ సర్పంచ్ కే. శేఖర్, కామారెడ్డి జిల్లా నాయకులు బాల్ కిషన్, పలువురు బీడీ ప్యాకర్లు, బుర్ర బాక్స్ లు పెట్టే కార్మికులు పాల్గొన్నారు. అనంతరం, బీడీ కంపెనీలో పనిచేస్తూ, పాల్వంచ గ్రామ సర్పంచ్గా ఎన్నికైన కే. శేఖర్ను, వెల్పుగొండ గ్రామంలో ఉపసర్పంచ్గా ఎన్నికైన కుమ్మరి రవిని, వార్డు మెంబర్గా ఎన్నికైన యెల్లయ్యను శాలువాలతో సన్మానించారు.
