ప్రైవేట్ పాఠశాలల్లో అక్రమాలపై LSO ఆగ్రహం: గుర్తింపు రద్దు చేయకపోతే ముట్టడిస్తాం

లంబాడి స్టూడెంట్ ఆర్గనేషన్ (LSO) ఉమ్మడి నిజాంబాద్ జిల్లా అధ్యక్షుడు ప్రకాష్ నాయక్ మాట్లాడుతూ, విద్యాశాఖ అధికారులు ప్రైవేట్ పాఠశాలల్లో తనిఖీలు నిర్వహించి, అక్రమాలకు పాల్పడుతున్న పాఠశాలల గుర్తింపును రద్దు చేయాలని డిమాండ్ చేశారు. కామారెడ్డి జిల్లా కేంద్రంతో పాటు మండల కేంద్రాల్లోని అనేక ప్రైవేట్ పాఠశాలలు అధిక ఫీజులు వసూలు చేస్తూ, అనుమతులు లేకుండానే అడ్మిషన్లు చేపడుతున్నాయని ఆయన ఆరోపించారు.

ప్రైవేట్ పాఠశాలల్లో సరైన గాలి, వెలుతురు లేని ఇరుకైన గదుల్లో తరగతులు నిర్వహిస్తున్నారని, ఆట స్థలాలు, మౌలిక వసతులు కల్పించడంలో విఫలమవుతున్నాయని LSO నాయకులు పేర్కొన్నారు. విద్యార్థులను తరలించే పాఠశాల బస్సుల పరిస్థితి కూడా దయనీయంగా ఉందని, ఫిట్నెస్ సర్టిఫికెట్లు లేని వాహనాలను, అనుభవం లేని డ్రైవర్లతో నడుపుతున్నారని ఆరోపించారు.

ప్రభుత్వ అనుమతులు లేకుండానే 9, 10 తరగతులకు అడ్మిషన్లు ఇస్తున్నారని, అర్హత కలిగిన ఉపాధ్యాయులు లేకుండానే నాణ్యత లేని విద్యను అందిస్తున్నారని LSO నాయకులు మండిపడ్డారు. ప్రభుత్వ అధికారులకు పలుమార్లు విన్నవించుకున్నా స్పందించకపోవడం సిగ్గుచేటని విమర్శించారు.

ఇప్పటికైనా అధికారులు నిద్రలేచి, ప్రైవేట్ పాఠశాలల్లో తనిఖీలు నిర్వహించి, నిబంధనలను ఉల్లంఘిస్తున్న పాఠశాలలపై కఠిన చర్యలు తీసుకోవాలని కోరారు. తక్షణమే చర్యలు తీసుకోకపోతే, LSO ఆధ్వర్యంలో జిల్లావ్యాప్తంగా ఆందోళనలు, ధర్నాలు నిర్వహిస్తామని, డీఈఓ కార్యాలయాన్ని ముట్టడిస్తామని హెచ్చరించారు. అవసరమైతే గాడిదతో డీఈఓ కార్యాలయాన్ని ముట్టడిస్తామని తీవ్ర హెచ్చరికలు జారీ చేశారు.