కామారెడ్డి జిల్లాలో అకాల వర్షాల కారణంగా ధాన్యం కొనుగోలు కేంద్రాల్లో తడిసిన ధాన్యాన్ని జిల్లా యంత్రాంగం యుద్ధ ప్రాతిపదికన సమీపంలోని మిల్లులకు తరలించింది. జిల్లా కలెక్టర్ ఆశిష్ సాంగ్వాన్ చొరవతో ఈ ప్రక్రియ వేగంగా పూర్తైంది.
ఈ నెల 27న కురిసిన అకాల వర్షాల వల్ల రామారెడ్డి, దోమకొండ, సదాశివనగర్, మాచారెడ్డి మండలాల్లోని కొన్ని ధాన్యం కొనుగోలు కేంద్రాల్లో సుమారు 1,064 మెట్రిక్ టన్నుల ధాన్యం తడిసిపోయింది. ఈ పరిస్థితిని సమీక్షించిన జిల్లా కలెక్టర్, సంబంధిత అధికారులకు తక్షణ చర్యలు తీసుకోవాలని ఆదేశించారు.
కలెక్టర్ ప్రత్యక్ష పర్యవేక్షణలో తహసీల్దార్లు, సివిల్ సప్లైస్ అధికారులు, ఇతర సిబ్బంది కొనుగోలు కేంద్రాలకు చేరుకుని, ప్రభావితమైన ధాన్యాన్ని సమీపంలోని పార్బాయిల్డ్ రైస్ మిల్లులకు తరలించే ప్రక్రియను వేగవంతం చేశారు. ధాన్యం మరింత నష్టపోకుండా రవాణా, అన్లోడింగ్, నిరంతర పర్యవేక్షణ ఏర్పాట్లను పటిష్టంగా అమలు చేశారు.
జిల్లా యంత్రాంగం తీసుకున్న సత్వర చర్యలపై రైతులు సంతృప్తి వ్యక్తం చేశారు. భవిష్యత్తులో మరిన్ని వర్షాల నేపథ్యంలో, అన్ని కొనుగోలు కేంద్రాల్లో ముందస్తు జాగ్రత్తలు తీసుకోవాలని కలెక్టర్ అధికారులను ఆదేశించారు. జిల్లా యంత్రాంగం పరిస్థితిని నిరంతరం పర్యవేక్షిస్తూ అవసరమైన చర్యలు తీసుకుంటుంది.
ఇప్పటివరకు జిల్లాలో 3,82,760 మెట్రిక్ టన్నుల ధాన్యం కొనుగోలు చేయగా, రూ. 914.41 కోట్లు విలువైనది. ఇందులో రూ. 783.57 కోట్లకు సంబంధించిన చెల్లింపులు రైతుల ఖాతాల్లో జమ అయ్యాయి, ఇది 86 శాతం చెల్లింపులకు సమానం. రైతుల ప్రయోజనాలను కాపాడటానికి, కొనుగోలు ప్రక్రియ సజావుగా సాగేందుకు యంత్రాంగం నిరంతరం పనిచేస్తుందని కలెక్టర్ తెలిపారు.
