ప్రజా పాలన – ప్రగతి ప్రణాళికలో భాగంగా నిర్వహిస్తున్న 'అరైవ్ అలైవ్' రోడ్డు భద్రత అవగాహన కార్యక్రమంలో భాగంగా, జిల్లా ఎస్పీ పరితోష్ పంకజ్ వాహనదారులకు రహదారి భద్రతపై అవగాహన కల్పించారు. ట్రాఫిక్ నిబంధనలను పాటించడం ద్వారా రోడ్డు ప్రమాదాలను నివారించవచ్చని ఆయన తెలిపారు.
నందిగామ గ్రామంలోని ఎస్.ఎన్. ఫంక్షన్ హాల్లో జరిగిన ఈ కార్యక్రమంలో జిల్లా ఎస్పీ ముఖ్య అతిథిగా పాల్గొన్నారు. రోడ్డు ప్రమాదాలను తగ్గించి, ప్రజల్లో రోడ్డు భద్రతపై అవగాహన పెంచే లక్ష్యంతో వారం రోజుల పాటు 'అరైవ్ అలైవ్' కార్యక్రమం నిర్వహిస్తున్నట్లు ఎస్పీ తెలిపారు. రోడ్డు ప్రమాదాల నివారణకు ట్రాఫిక్ నిబంధనలపై అవగాహన తప్పనిసరి అని ఆయన నొక్కి చెప్పారు.
ప్రతి వాహనదారుడు ట్రాఫిక్ నిబంధనలు పాటిస్తూ, హెల్మెట్ మరియు సీట్ బెల్ట్ తప్పనిసరిగా ధరించి, పరిమిత వేగంతో ప్రయాణించాలని ఎస్పీ సూచించారు. అతివేగం తాత్కాలిక ఆనందాన్ని కలిగించినప్పటికీ, ప్రాణ నష్టానికి దారితీసే ప్రమాదం ఉందని ఆయన హెచ్చరించారు. కుటుంబ యజమానిని రోడ్డు ప్రమాదంలో కోల్పోతే ఆ కుటుంబం ఎదుర్కొనే కష్టాలను ప్రతి ఒక్కరూ ఆలోచించాలని అన్నారు.
గమ్యాన్ని సురక్షితంగా చేరుకోవడం అత్యంత ముఖ్యమని ఎస్పీ పేర్కొన్నారు. ముఖ్యంగా యువత, కొత్త బైకులు ఉన్నప్పటికీ, హెల్మెట్ ధరించకపోవడం, జుట్టు చెడిపోతుందనే కారణాలతో నిర్లక్ష్యం వహించడం వల్ల ప్రమాదాలకు గురవుతున్నారని ఆందోళన వ్యక్తం చేశారు. ఏ పరిస్థితుల్లోనూ హెల్మెట్ లేకుండా ప్రయాణించకూడదని, డ్రైవింగ్ సమయంలో సెల్ ఫోన్ వినియోగించకూడదని ఆయన సూచించారు.
