జవహర్ నగర్ ట్రాఫిక్ పోలీస్ స్టేషన్ పరిధిలో నిబంధనలకు విరుద్ధంగా బ్లాక్ ఫిలిం, టింటెడ్ గ్లాస్ అమర్చిన వాహనాలు, అనధికారిక సైరన్లు వినియోగించే వాహనాలపై పోలీసులు మంగళవారం ప్రత్యేక తనిఖీలు నిర్వహించి, 40కి పైగా వాహనాలపై కేసులు నమోదు చేశారు.
మేడ్చల్-మల్కాజిగిరి జిల్లాలో, మల్కాజ్గిరి ట్రాఫిక్ జోన్-1 డీసీపీ రాహుల్ రెడ్డి ఐపీఎస్ పర్యవేక్షణలో ఈ డ్రైవ్ చేపట్టారు. వాహనాల అద్దాలకు అమర్చిన బ్లాక్ ఫిలిం, టింటెడ్ గ్లాస్ను పోలీసులు స్వయంగా తొలగించారు. ముఖ్యంగా ఖరీదైన కార్లు, కొత్త మోడల్ థార్ వాహనాల్లో అధికంగా బ్లాక్ ఫిలిం వినియోగిస్తున్నట్లు గుర్తించారు.
జవహర్ నగర్ ట్రాఫిక్ సీఐ కే. శివశంకర్ మాట్లాడుతూ, వాహనం లోపల ఉన్నవారు బయట నుంచి స్పష్టంగా కనిపించేలా విజిబిలిటీ ఉండాలని, 30 శాతం కంటే ఎక్కువ బ్లాక్ ఫిలిం వాడటం చట్టవిరుద్ధమని తెలిపారు. అసాంఘిక కార్యకలాపాలను నిరోధించేందుకు ఈ చర్యలు తీసుకుంటున్నట్లు ఆయన పేర్కొన్నారు.
అనధికారిక సైరన్ల వాడకంపై కూడా పోలీసులు కఠినంగా వ్యవహరిస్తున్నారు. అంబులెన్స్, ఫైర్, పోలీస్, ఆర్టీఏ వాహనాలు మినహా ఇతర ప్రైవేట్ వాహనాలకు సైరన్లు వాడే అధికారం లేదని స్పష్టం చేశారు. ఎమ్మెల్యే, ఎంపీ, ఎమ్మెల్సీ పేర్లతో అనధికారిక స్టిక్కర్లు పెట్టుకుని తిరిగే వాహనాలపై కూడా కేసులు నమోదు చేస్తామని హెచ్చరించారు.
ప్రజలందరూ ట్రాఫిక్ నియమాలను పాటించి, పోలీసులకు సహకరించాలని అధికారులు విజ్ఞప్తి చేశారు. ఈ తనిఖీలు నిబంధనల ఉల్లంఘనలపై పోలీసుల నిబద్ధతను తెలియజేస్తున్నాయి.
