కామారెడ్డి జిల్లా పోలీసు కార్యాలయంలో శనివారం, పోలీసు వ్యవస్థలో దశాబ్దాల పాటు సేవలందించిన ఇద్దరు ఎస్సైలకు వారి పదవీ విరమణ సందర్భంగా ఘనంగా వీడ్కోలు పలికారు.
జిల్లా ఎస్పీ యం. రాజేష్ చంద్ర ఆధ్వర్యంలో జరిగిన ఈ కార్యక్రమంలో, కామారెడ్డి టౌన్ పోలీస్ స్టేషన్ ఎస్సై డి. శ్రీరామ్, కలెక్టర్ కార్యాలయ ఎస్సై డి. ఉదయ్ శేకర్ లకు వారి కుటుంబ సభ్యుల సమక్షంలో సన్మానం చేశారు. ఎస్సైలు అందించిన నిస్వార్థ సేవలను ఎస్పీ కొనియాడారు.
పదవీ విరమణ చేసిన అధికారులను, వారి సతీమణులను శాలువాలు, పూలమాలలతో సత్కరించి, జ్ఞాపికలను అందజేశారు. ప్రజల రక్షణ కోసం వీరు ఎదుర్కొన్న సవాళ్లను, వారి సేవలను ఎస్పీ ప్రశంసించారు.
1989లో కానిస్టేబుళ్లుగా వృత్తిని ప్రారంభించి, దాదాపు 37 ఏళ్ల పాటు వివిధ హోదాల్లో సేవలందించిన వీరి నిబద్ధత యువ అధికారులకు ఆదర్శమని అన్నారు. వీరి సేవలు పోలీసు శాఖకు గర్వకారణమని పేర్కొన్నారు.
పదవీ విరమణ అనంతరం, అధికారులు తమ కుటుంబ సభ్యులతో కలిసి ఆరోగ్యంగా, సుఖసంతోషాలతో జీవితాన్ని గడపాలని ఎస్పీ ఆకాంక్షించారు. ఈ కార్యక్రమంలో పలువురు పోలీసు అధికారులు, సిబ్బంది పాల్గొన్నారు.